Ambasada e Shteteve të Bashkuara në Tiranë ka reaguar sërish në lidhje me Reformën në Drejtësi.
Në një deklaratë zyrtare të postuar në Facebook, ambasada shpreh përkushtimin e saj ndaj reformës e cilas sipas saj është kërkesë e popullit shqiptar. Ambasada shkruan se do të mbështesë synimin e popullit shqiptar dhe kërkon që të mos humbasë përqendrimi pasi synimi është i qartë dhe reforma në drejtësi duhet të ecë përpara.
“Shtetet e Bashkuara mbeten vendosmërisht të përkushtuara ndaj reformës në drejtësi, e cila është kërkesë e popullit shqiptar. Në përgjigje të kësaj kërkese, në vitin 2016, Parlamenti miratoi unanimisht ligjet themelore për reformën. Prej atëherë, janë ngritur institucione kyçe dhe zbatimi vazhdon për t’i bërë ato funksionale. Reforma është e dhimbshme, e ngadaltë dhe e papërsosur por është e nevojshme. Reforma në drejtësi po ecën përpara dhe duhet të vazhdojë, në mënyrë që Shqipëria të bëhet anëtare e plotë e familjes europiane. E gjithë Ambasada e Shteteve të Bashkuara të Amerikës do të vijojë të mbështesë synimin e popullit shqiptar. Ne nuk duhet të humbasim përqëndrimin, ne nuk duhet të çorientohemi – synimi është i qartë, populli shqiptar foli dhe reforma në drejtësi duhet të ecë përpara, hap pas hapi.”- shkruan ambasada.
Disa ditë më parë ambasadorja Kim shprehu shqetësimin e saj në Tëitter për një marrëveshje prapa krahëve për të vrarë reformën në drejtësi ndërsa në një dalje për mediat një ditë më vona ajo tha se “ka ardhur koha të mos bëni më lojëra” dhe se Shqipëria nuk mund të jetë pjesë e BE “pa Reformën Zgjedhore dhe Reformën në Drejtësi”.
Shënjestra e deklaratave të ambasadores mbeti e paqartë. Kreu i opozitës Lulzim Basha u shpreh se ato nuk mund të ishin të drejtuara ndaj tyre pasi sipas tij kërkesa për ndryshimin e reformës kishin ardhur nga grupi parlamentar socialist.
Presidenti Ilir Meta, i pyetur në studion e emisionit “Opinion”, nëse ishte target i këtij mesazhi, sikurse kishte cituar edhe Zëri i Amerikës, tha se askush nuk mund të ketë target presidentin. Ai tha gjithashtu se Reforma në Drejtësi është kthyer në Ramaformë dhe se ka ndërkombëtarë të caktuar të kapur nga kryeministri Rama ndonëse nuk përmendi emra konkretë. /Opinion.al
