Reforma në drejtësi duket se do të thellojë edhe njëherë ndarjen mes aleatëve në koalicionin qeveritar. E nisur që vjet pas zgjedhjeve lokale,dasitë e PS dhe LSI po ravijëzohen qartë jo vetëm në nivelet lokale të qeverisjes (rastet kur votat e LSI janë bashkuar me ato të PD) por së fundmi dhe në të shumëperfolurën reformë në drejtësi. 4 ekspertët me emër të madh nuk munden dot që me variantet e servirura dhe me ndihmën e ndërkombëtarëve të merrnin konsensusin e palëve, kjo për shkaqe dhe vullnete krejtesisht politike.
Të tilla vullnete kanë qenë ato që ndër vite në fakt kanë bërë të mundur ndryshimet në kushtetutë apo hartimet e kodeve zgjedhore. Edhe këte herë ndodhi njësoj, ekspertet e partive të mëdha ishin ata që diskutonin për ndryshimet në kushtetutë, por kryetarët e partive në fund vendosnin për variantin final.
Sikundër ndodhi që gjatë dy ditëve të fundit, ministri i drejtësisë gati vuri veton që kjo reformë nuk mund të kalojë pa miratimin e opozitës, duke e konsideruar reformën në tërësi një proçes që nuk mund të ecë përpara pa konsensusin e palëve. Ky qendrim i LSi që ka dhe mbështetjen e PD, duket të jetë zhvilluar dhe me komunikim nëpërmjet emaileve mes ekspertëve të aleatëve te dikurshëm.
Që sot, në emër të reformës duken të jenë të afërt si në kohët kur Meta dhe Berisha qeverisnin bashkë. Këtij fakti i shtohen dhe spekulimet e disa mediave së Meta nuk ka pritur sot Ramën apo që PD nuk reagoi për akuzat e reja që u ngritën ndaj Metës. “Flirtimi” nga larg mes PD dhe LSI është konkretizuar në nivel ekspertësh në kuadër të reformës, por dhe me mesazhe që emisarë të të dy drejtuesve i kanë nisur njëri tjetrit.
Këto zhvillime dhe ngecja e reformës në emër të konsensusit mes palëve shtron dhe njëherë pikëpyetjet e aleancës tashmë të brishtë mes Ramës dhe Metës. Një bashkëpunim që me ulje ngritjet e vitit të fundit ka treguar se nuk mund të jetë jetëgjatë në një skenë politikë me dinamika të mëdha dhe ku pakënaqësitë është e vështirë të fshihen.
I nisur si një proces për t’i ardhur në ndihmë sistemit tepër problematik të drejtësisë në Shqipëri, reforma e inicuar dhe drejtuar me se shumti nga ndërkombëtarët, vetëm se nxorri në pah mosmarrveshjet dhe aleancat fluidë mes partive të mëdha në Shqipëri. Keto perpjekje dëshmuan dhe njëherë qartë se në këtë vend, më shumë se mungesë legjislacioni, ka mungesë vullneti për të zbatuar dhe këto ligje që kemi.
Që çdo përpjeke për të luftuar korrupsionin me ndryshime ne kushtetute mund të jetë një fiasko në Shqipërinë e kapluar nga kriza jo vetëm ekonomike por e moralit dhe e njerëzve me integritet të lartë moral që nëse do të ishin, do ta bënin këtë vend më pak të korruptuar edhe me keto ligje që kemi.
