Ambasada e SHBA në Shqipëria ka reaguar pas takimeve të zhvilluar sot të zyrtarit të Lartë të DASH Philip T. Reeker me kryeministrin Edi Rama dhe kreun e PD, Lulzim Basha.
Ambasada shkruan se në këto takime Reeker ka theksuar rëndësinë e marrëdhënieve SHBA-Shqipëri gjatë 30 viteve të fundit.
Po ashtu, ai ka folur për vendosmërinë e Presidentit Biden dhe Sekretarit të Shtetit Blinken se lufta kundër korrupsionit është një interes thelbësor i sigurisë kombëtare për SHBA.
Reeker përgëzoi udhëheqësit e Shqipërisë për suksesin e tyre në pritjen e Ushtrimit Defender Europe 21, i cili theksoi rolin strategjik të Shqipërisë në rajon.
Zyrtari i Lartë i DASH përsëriti mbështetjen e fortë të Shteteve të Bashkuara për reformat në sistemin e drejtësisë, luftën kundër krimit të organizuar si dhe integrimin e Shqipërisë në BE.
“Ndihmës Sekretari i Shtetit në Detyrë për Çështjet Evropiane dhe Euroaziatike, Ambasadori Philip T. Reeker vizitoi sot Tiranën. Gjatë vizitës, ai u takua me Kryeministrin Rama, Kryetarin e Partisë Demokratike Lulzim Basha, disa prej anëtarëve të verifikuar plotësisht të sistemit të drejtësisë në Shqipëri, si dhe udhëheqës të tjerë. Përgjatë të gjitha takimeve, Ndihmës Sekretari në Detyrë Reeker theksoi rëndësinë e marrëdhënieve SHBA-Shqipëri gjatë 30 viteve të fundit, që kur Shqipëria refuzoi diktaturën komuniste dhe pranoi demokracinë. Ai nënvizoi vendosmërinë e Presidentit Biden dhe Sekretarit të Shtetit Blinken se lufta kundër korrupsionit, përfshirë përmes përcaktimeve publike për korrupsion madhor sipas Nenit 7031(c) të Departamentit të Shtetit për Operacionet e Jashtme, dhe Programet Përkatëse të Nenit mbi Përvetësimet 2021, është një interes thelbësor i sigurisë kombëtare për Shtetet e Bashkuara. Ai përgëzoi udhëheqësit e Shqipërisë për suksesin e tyre në mikpritjen e Stërvitjes Defender Europe 21, e cila theksoi rolin strategjik të Shqipërisë në rajon. Ai mirëpriti rolin e Shqipërisë në rajon dhe në arenën globale, ndërsa Shqipëria merr vendin në Këshillin e Sigurimit të OKB-së. Ndihmës Sekretari në Detyrë përsëriti mbështetjen e fortë të Shteteve të Bashkuara për reformat në sistemin e drejtësisë dhe në luftën kundër krimit të organizuar, duke nënvizuar se si përparimi në këto çështje do të nxisë demokracinë, mbrojtjen dhe biznesin në Shqipëri dhe do të vijojë rrugën e Shqipërisë drejt pranimit në Bashkimin Europian’, shkruan ambasada e SHBA. / Opinion.al
