Përpjekja për ti bërë ballë pandemisë së koronavirusit është quajtur një luftë jo vetëm nga kryeministri Rama por dhe nga drejtues të shteteve më të mëdha të botës si SHBA, Franca apo dhe Gjermania.
Masa të paprecedenta janë marrë në pothuajse të gjithë Europën, masa që nuk janë parë as në kohë lufte. E ndërsa tërë bota është në ankthin e goditjes nga virusi i padukshëm dhe vrullin e gjetjes sa më shpejtë të një vaksine, në një pikë të Europës jeta vazhdon normalisht.
I konsideruar si regjimi i fundit në Europë, Bjellorusia thuajse ka injoruar cdo paralajmërim për rrezikun e kësaj pandemie vdekjeprurëse dhe madje presidenti i saj Aleksandër Lukashenko ka një recetë se si të shërhemi nga virusi.
“Populli të bëj sauna, të pijë shumë vodka dhe të punojë po aq, që të shkatërrojë virusin brenda tij”, ishte deklarata e njeriut që qeveris që nga viti 1994 Bjellorusinë me një sistem të ngjajshëm me atë të Bashkimit Sovjetik.
Vendi i ka injoruar aq shumë marrjen e masave sa nuk ka ndërprerë as kampionatin e futbollit dhe as pjesëmarrjen në stadiume. Dje atje nisi sezoni i ri dhe dy ndeshjet e para jo vetëm që u zhvilluan rregullisht, por ishin plot me tifozë dhe pa asnjë masë parandaluese.
Zëdhënësi i federatës, Alexandr Alenik, është shprehur se janë në dijeni “ që shumë kampionate të tjera janë pezulluar por koha kur mund të luajmë futboll për ne kufizohet nga pranvera deri në vjeshtë”.
Bjellorusia aktualisht numëron 69 të prekur me koronavirus nga të cilët deklaron se 15 janë rikuperuar. Megjithatë shifrat e vendeve me regjime autoritare merre me rezerva. Mos marrja e masave mund ta cojë vendin në kolaps duke marrë parasysh se atje temperaturat janë shumë të ulta, të favorshme për përhapjen e viruseve. /Opinion.al
