Është realizuar me sukses implanti koklear për fëmijët që nuk dëgjojnë, me financim nga shteti.
Lajmi është bërë i ditur nga Ministria e Shëndetësisë, ndërsa ndërhyrjet janë realizuar te 5 fëmijë nga mosha 2-7 vjeç në shërbimin e Otorino-Laringologjisë në QSUT, apo siç njihet si Spitali Francez.
Ndërkohë, ministrja e Shëndetësisë Ogerta Manastirliu vlerësoi punën e stafeve mjekësore dhe garantoi financimin nga shteti të paketës së implantit koklear.
“Për mua është ndër lajmet më të gëzuara që ja mbërritëm kësaj dite për të realizuar implantin koklear. Kjo është realizuar falë ekspertizës së mjekëve por edhe mbështetjes së qeverisë për sigurimin e financimit për paketën falas të implantit koklear. Janë pesë fëmijë që do t’u rikthehet dëgjimi dhe integrohen plotësisht në jetën sociale dhe ne do të vazhdojmë ta mbështesim këtë paketë falas”, tha Manastirliu.
Mësohet se 20 fëmijë me nevoja të veçanta (shurdhësi e lindur) do të përfitojnë në vit paketën e implantit koklear (ndërhyrja dhe aparati i posaçëm që i rikthen dëgjimin).
Ndërhyrja është definitive dhe arrin të integrojë plotësisht fëmijët në jetën sociale, pas një procesi të gjatë rehabilitimi. Kosto e trajtimit për çdo fëmijë është 29 mijë dollarë, e cila mbulohet 100% nga shteti, sipas Ministrisë së Shëndetësisë.
