Turneu amerikan International Champions Cup do të ndizet nga përballja më elektrizuese e futbollit botëror në nivel klubesh. Në fakt, në orët e para të mëngjesit të së dielës (2:05) Real Madrid dhe Barcelona do të ndeshen në “Hard Rock Stadium” të Miamit. Edhe pse bëhet fjalë për një miqësore, “El Clasico” mbetet “El Clasico” dhe spektakli është i garantuar. Gjithsesi, kësaj super sfide do t’i mungojë ylli i “Los Blancos” Cristiano Ronaldo, i cili nuk ka udhëtuar me skuadrën në Amerikë, për shkak se ka marrë pjesë në Kupën e Konfederatave dhe, për rrjedhojë, i ka filluar me vonesë pushimet. Toni Kroos dhe Sergio Ramos nuk kanë marrë pjesë në humbjen e thellë 4-1 të pësuar kundër Manchester City dhe duhet të jenë titullarë kundër rivalëve katalanas. Ndërkohë, vendin e lënë bosh në sulmnga Ronaldo pritet ta marrë Gareth Bale.
Sezoni i kaluar nuk ka qenë shumë pozitiv për sulmuesin, i cili është ndalur nga dëmtimet. Për këtë arsye uellsiani do të kërkojë t’i tregojë përsëri botës se çfarë është një gjendje të bëjë. Dhe ku ka rast më të mirë se në një ndeshje kundër Barcelonës. Real ka luajtur dhe humbur dy ndeshjet e zhvilluara në International Champions Cup. Kundër Manchester United, madrilenët janë dorëzuar pas penalltive, ndërsa kundër City ka ardhur një humbje zhgënjyese. Ndërkohë, e ardhmja e Neymar vazhdon të jetë në dyshim, por, për momentin, Barcelona e ka në dispozicion treshen “MSN”. Të tre kanë luajtur kundër Manchester United dhe duhet të jenë në fushë edhe kundër Real Madrid. Neymar ka realizuar të gjithë tre golat e shënuar nga katalanasit deri tani në këtë turne. Barça ka fituar dy ndeshjet e para të IÇ, të luajtura kundër Juventus dhe “Djajve të Kuq”.
