Kryetari i LDK-së, Isa Mustafa ka reaguar pas deklaratës së ushtrueses së detyrës së presidentit të Kosovës, Vjosa Osmani, e cila dënoi ashpër vendimin e një dite më parë të Komisionit Qendror të Zgjedhjeve për të mos certifikuar listat e kandidatëve të disa subjekteve politike, mes të cilave dhe të Vetëvendosjes.
Në reagimin e tij, Mustafa ka theksuar se Osmani nuk e meriton që të jetë presidente. Mustafa e ka quajtur të turpshme që presidentja akuzon sipas tij institucionet e pavarura siç është KQZ-ja.
LEXO EDHE: Vendimi i KQZ, reagon Osmani: Veproi me agjendë politike
“Adresimi i tillë i znj. Vjosa Osmani, flet se ajo është një ushtruese krejtësisht e papërgjegjshme e rolit të presidentit. Nga u.d presidentja është pritur ta mbrojë Aktgjykimin e Gjykatës Kushtetuese, të mbrojë implementimin e ligjit dhe të mbrojë institucionet e pavarura. Ajo petkun e u.d së presidentit po e abuzon me sjellje rebele dhe për interesa të saja të ngushta partiake në VV. Është e palejueshme dhe e turpshme që u.d presidentja t’iu kërcënohet institucioneve të pavarura. Me këtë sjellje, ajo nuk meriton as një orë të jetë në Presidencë”, i tha Mustafa Express.
Kujtojmë se Komisioni Qendror i Zgjedhjeve në Kosovë nuk i certifikoi listat zgjedhore me emrat për deputetë të subjekteve politike, Vetëvendosje, Nisma Socialdemokrate dhe Aleanca për Ardhmërinë e Kosovës, për të marrë pjesë në zgjedhjet e jashtëzakonshme parlamentare të 14 shkurtit./ Opinion.al
