Ish-parku i Transporteve në “Don Bosko” nuk do të përdoret për grumbullim të plehrave, por për parkim të flotës së “Eco Tirana”. Këtë sqarim japin në Bashkinë e Tiranës pas shkrimit të publikuar në “Monitor” dhe më tej në të gjitha mediat.
Bëhet fjalë për një kontratë mes “Eco Tirana” dhe Bashkisë së Tiranës për menaxhimin e plehrave në Tiranë. Burimet nga ky institucion thanë se vendimi merret ditën e premte në mbledhjen e Këshillit Bashkiak dhe parashikon dhënien pa shpërblim të 22 mijë metrave katrorë tek ish-parku i Transporteve për shoqërinë “Eco Tirana”. Këto burime rrëzojnë argumentet e revistës Monitor se në këtë sipërfaqe mund të bëhet përpunim mbetjesh. Ato thanë se ish-Parku do të jepet për ndërtimin e infrastrukturës së nevojshme për ushtrimin e funksioneve të shoqërisë “Eco Tirana sha”. Pra do të përdoret si parkim për makinat që do të mbledhin plehrat në kryeqytet.
