Ministri i Brendshëm, Taulant Balla ka folur mbrëmjen e sotme në emisionin “Opinion”, përmes një lidhje skype lidhur me ngjarjen e rëndë në Shkodër dhe dhunën e ushtruar në familje.
Ai ka theksuar se dhuna në familje duhet denoncuar dhe moskallëzimi i tij është një tjetër krim.
“Ajo që ua kam thënë un para pak ditësh, lidhet pikë së pari me nevojën për të rritur ndërgjegjsimin jo vetëm të viktimave por të gjithë për një krim, pa harruar këtu qe moskallëzimi i krimit është një tjetër vepër penale.
Ajo që dua të them është që duhet të nxisim të gjitha vajzat dhe gratë e këtij vendi të cilat janë viktima dhune se nuk është një jetë e vështirë që i pret, por është një moment çlirimi dhe lirie”, tha ai.
Fevziu: Teorikisht Balla a kanë bashkitë, shtëpi ose apartamente që mund t’i akomodojnë, pasi baballarët nuk i japin as pensionin që i është caktuar nga gjykata?
Balla ka theksuar ndër të tjera se kanë hapur ambiente ose strehëza për gratë e dhunuara.
“Ajo që duhet të kuptojmë është që me mbështetjen e shtetit dhe me angazhimin e një numri të caktuar të organizatave joqeveritare janë krijuar pothuajse vatra, strehëza sociale ku vajza dhe gra janë shkëputur nga zinxhiri i dhunës dhe vuajtjeve dhe kanë filluar një jetë të re.
Janë rreth 4700 raste të raportuara për dhunë në familje dhe rreth 800 persona, kryesisht meshkuj të arrestuar për dhunë”, u shpreh Balla.
