Sipas një raporti zyrtar, që është shpërndarë nga gazeta si Wall Street Journal, autoritetet kineze kanë arritur të gjurmojnë të ashtuquajturin “pacienti 1”, pra personin e parë të testuar me koronavirus.
Ajo është, Wei Guixian(Guishian), një shitëse produktesh deti në markatën e qytetit Huanan, ku edhe nisën të evidentoheshin rastet e para të koronavirus.
Në dokumente del edhe një intervistë me shitësen, e cila tregon se simptomat e para dhe ethet i erdhën në 11 dhjetor, dhe se për ditë të tëra kishte anashkaluar simptomat, duke menduar për një grip sezonal.
Gjendja e saj u përkeqësua vetëm ditë më vonë, me mjekët që fillimisht nuk arrinin t’ i jepnin një diagnozë, deri sa ajo u paraqit tek spitali kryesor i Wuhanit në 16 dhjetor, dhe iu tha që edhe pacientë të tjerë paraqisnin simptomatologjinë e saj.
Ngelet ende mister ndërkohë i ashtuquajturi “pacienti “zero”, pra personi i parë i infektuar nga koronavirusi dhe i sëmurë me COVID-19, ndërkohë që sipas analizave sekrete të qeverisë kineze, të botuara sërish nga Wall Street Journal, rasti i parë i dyshuar në spital i referohet 17 nëntorit, pra 6 javë para se autoritetet t’ i zbulonin botës se një epidemi e re dhe e panjohur po merrte formë, dhe se në 31 dhjetor ishin tashmë 266 pacientët e infektuar.
Qeveria kineze ka mohuar deri tani akuzat mbi përgjigjen e saj ndaj shpërthimit epidemik, duke thënë se kjo përgjigje ishte e shpejtë dhe kohezive që në pikënisje./Opinion.al
