Partia Demokratike ka reaguar për rastin e kryebashkiakut të Mallakastrës Qerim Ismailaj, i cili sipas prokurorisë rezulton se ka qenë i dënuar me tre vite burg në Greqi.
Në një postim në Facebook, Sekretari i Përgjithshëm i Partisë Demokratike Gazment Bardhi, thotë se “një tjetër burgaxhi i Edi Ramës do të largohet nga qeverisja”.
Më tej, ai thekson se megjithëse me 1 vit e gjysëm vonesë, u provua vërtetësia e qendrimit të Partisë Demokratike.
“Sot kemi një lajm të mirë! Një tjetër burgaxhi i Edi Ramës do të largohet nga qeverisja. Megjithëse me 1 vit e gjysëm vonesë, u provua vërtetësia e qendrimit të Partisë Demokratike se Kryebashkiaku ilegjitim i Mallakastrës, Qerim Ismailaj, është i dënuar me burg në Greqi dhe se ai e ka fshehur këtë fakt në formularin e dekriminalizimit.
Qerim Ismailaj është produkt politik i Edi Ramës, njësoj si mbi 20 kriminelë të tjerë që ai i futi në parlament, i emëroi në bashki dhe vazhdon me ta bashkëqeverisjen për të vjedhur pasuritë e shqiptarëve dhe bashkë me to, edhe votën e tyre. Megjithatë, përballë të vërtetës, Edi Rama është i pafuqishëm për të mbrojtur kriminelët që e sollën në pushtet. Herët apo vonë, edhe ai vetë do të përballet me drejtësinë! E vërteta vonon, por nuk harron!”, shkruan Bardhi.
Kujtojmë se ky kryebashkiak u denoncua nga Sekretari i Përgjithshëm i Partisë Demokratike Gazment Bardhi. Më herët PD ka bërë publike dokumentin e Prokurorisë së Athinës, ku, sipas saj, Gjykata e Kiosit e ka dënuar me 3 vite burg kryebashkiakun e Mallakastrës./Opinion.al
