Zhveshja lakuriq në shatërvanin e famshëm të Fontana di Trevi, noti në kanalet e Venecias, shkarravitja e mureve të Koloseut e deri te vjedhja e mbetjeve vullkanike të Pompeit, janë disa nga aktet e përdhosjes së destinacioneve turistike dhe historisë në Itali që janë bërë nga turistët e huaj.
Sjelljet e këqija të turistëve kanë xhindosur në vazhdimësi italianët dhe u rikthyen në vëmendje pasi një çift britanik një javë më parë gdhendën emrat e tyre në murin e Koloseut të lashtë të Romës.
Dhe me turizmin që tani është kthyer në nivelet e para-pandemisë, kërdija duket se është përsëri në rrjedhë të plotë dhe më shumë mundësi turistët do të shkaktojnë kaos rreth monumenteve antike.
Pavarësisht nëse bëhet fjalë për prishjen dhe përdhosjen e relikeve të lashta, ose për shkaktimin e një shqetësimi publik, shumë prej tyre madje janë përballur me gjoba për mashtrimet dhe janë përballur me zemërimin e autoriteteve italiane.
Sërf në kanalin e madh të Venecias me hidrofoile elektrike
Ndoshta një nga rastet më të rrezikshme të turistëve që nuk respektonin vendet e çmuara të Italisë, ishte ai ku dy australianë lëvizën përgjatë Kanalit të Madh të Venecias mbi hidrofoilat elektrike .
Dy burrat u filmuan duke “kapur dallgët” në gusht të vitit të kaluar dhe veprimi i tyre zemëroi si turistët ashtu edhe vendasit.
Zhytje nga 30 metra në kanalet e Venecias
Një turist gjithashtu inatosi kryebashkiakun e Venecias në mars, pasi ai u hodh me bark nga 30 metra lartësi në kanalet ikonike të qytetit.
Me tutat e plazhit veshur, turisti u hodh nga parvazi i një pallati dhe u përplas me bark në ujë.
Vandalët e Koloseumit
Ivan Dimitrov tashmë njihet për shkarravitjen e Koloseumit, duke shkruar ‘Ivan + Hayley’, por ai nuk është i vetmi që është kapur në flagrancë duke lënë gjurmë në amfiteatrin 2000-vjeçar të Romës.
Në janar 2017, Koloseu u vandalizua me bojë të zezë. Emri ‘Balto’ dhe fjala ‘Morte’ (vdekje) u spërkatën mbi një prej kolanave të tij gjatë natës.
Turistë që notojnë në kanalin e madh të Venecias
Në ditën kur turistët u mirëpritën në qershor 2020, për të parën herë pas bllokimit prej Covid-19, dy gjermanë në Venecia u gjobitën me 400 £ secili pasi u zhytën dhe notuan në Kanalin e Madh. Të dy u filmuan duke lëvizur nëpër ujë nën urën e Rialtos. Përveçse uji është mjaft i ndotur dhe i pakëndshëm, noti në të është gjithashtu i paligjshëm.
Turiste me bikini lahen në shatërvanët e Romës
Në vitin 2016, tre turiste të veshura me bikini bënë bujë kur u futën për t’u freskuar në një shatërvan 400-vjeçar për t’i shpëtuar vapës së verës.
Pamjet bënë bujë në rrjetet sociale pasi vajzat shijuan freskinë e Fontana dell’Acqua Paola në Romë, me vendasit që e konsideruan këtë një sjellje të pahijshme.
Zhytje lakuriq në Fontana di Trevi
Një ide të ngjashme me vazjat kishin edhe disa turistë britanikë, por këtë herë ata u zhveshën lakuriq dhe kërcyen në ujin e ftohtë të shatërvanit Fontana di Trevi në Romë.
Njëri nga burrat pozoi edhe për foto nën shatërvan, në incidentin që ndodhi më gusht të 2018.
Ecja me skuter elektrik në shkallët spanjolle të Romës
Në qershor të vitit të kaluar, një turiste amerikan shkaktoi dëme mbi 25,000 euro pasi ngau një skuter elektronik në shkallët historike spanjolle të Romës.
Ngjarja u filmua nga një kalimtar, me pamjet që u bënë virale pasi u publikuan nga disa faqe italiane të lajmeve.
Pamjet tregojnë gruan e paidentifikuar, për të cilën autoritetet italiane thanë se ishte një turiste amerikane e moshës 28-vjeçare, duke hedhur skuterin elektronik e marrë me qira poshtë shkallëve pasi tentoi ta ngiste në to.
Vjedhja e objekteve të lashta romake nga Pompei
Ndërsa disa turistë janë qortuar për sjelljen e tyre të papranueshme rreth monumenteve të Italisë, të tjerë kanë vjedhur haptazi.
Në vitin 2018, një turist francez u gjobit 200 euro dhe u dënua me kusht pasi u kap në flagrancë duke vjedhur objekte historike nga Pompei.
Pierre Luc Giglio, atëherë 52 vjeç, u kap nga rojet e sigurisë, të cilët gjetën 13 fragmente terrakote dhe një copë mermeri që besohej se ishte marrë nga Shtëpia e Loreius Tiburtinus.
