Në Shqipëri janë të shumtë ata që kanë hapur depozita kursimi në banka por ama janë të paktë ata që kanë llogari të majme.
Kështu, një raport i fundit i Agjencisë së Sigurimit të Depozitave tregon se janë 1.5 milionë individë aktivë me kursime në banka, por sasia më e madhe e parave në banka, rreth 5 miliardë euro, është në duart e një pjese të vogël të depozituesve. Vetëm në 6% përqind të tyre.
Po sipas këtij raporti, rreth 3 miliardë euro i kanë 94 përqind e depozituesve.
Pjesa më e madhe e individëve që kanë kursime në banka janë poshtë nivelit prej 2,5 milionë lekësh, shumë kjo që garantohet 100% nga shteti për çdo depozitues nëse në rast se ndonjë bankë falimenton.
“Në sektorin bankar niveli maksimal i mbulimit është 2.5 milionë lekë dhe gjykojmë që është nivel i mjaftueshëm duke marrë bazë kushtet dhe karakteristikat e vendit dhe standardet ndërkombëtare”, thotë Genci Mamani, drejtori i Agjencisë së Sigurimit të Depozitave.
Agjencia thotë se sistemi bankar është i sigurtë dhe se skema e sigurimit garanton si depozitat në lekë ashtu dhe ato në valutë.
