Partia Demokratike iu referua sot raportit të Stadard’s and Poor për të denoncuar qeverinë se ka zhytur ekonominë në borxh të cilin e ka të pamundur ta paguajë.
Ish-deputetja demokratike, Jorida Tabaku deklaroi se bilanci ekonomik për vitin 2019 ishte negativ pasi “konsumi ishte në nivelet më të ulëta në vite, 49 përqind e shqiptarëve në kushte varfërie, të ardhurat e munguara rreth 116 milionë euro dhe një rënie drastike e besimit në ekonomi nga qytetarët dhe bizneset”.
Kjo situatë tha Tabaku reflektohet edhe raportin e S&P të cilin sipas saj qeveria refuzoi ta bënte publik.
“Raporti evidenton edhe një herë problemet më akute të ekonomisë sonë; Borxhi i lartë, i një qeverie që shpenzon për luksin e tepruar dhe oligarkët e oborrit por jo për shqiptarët dhe nevojat e tyre. Raporti i Standart and Poor’s rivërteton edhe një herë që Shqipëria ka një rrezik që vjen nga PPP-të të cilat po bëhen gjithnjë e më të pakontrollueshme. Qeveria nuk ofron asnjë siguri se do të respektojë tavanin e përcaktuar për pagesën e PPP-ve siç nuk ofron asnjë garanci për të kontrolluar kontratat dhe eficencën e tyre. Me një rritje ekonomike të dobët, me një nivel të lartë të borxhit, me një sistem të atrofizuar dhe mbi të gjitha me rreziqet e PPP-ve dhe Korporatës së Investimeve. Shqipëria e 2020 do të jetë një vend më i zymtë dhe më i varfër, jo sepse Shqipëria nuk ka mundësi, jo sepse shqiptarët janë të pazotë. Por, sepse qeveria sot nuk është e shqiptarëve por e oligarkëve dhe bandave që përfaqësohen në parlament” deklaroi Tabaku.
Ajo shtoi se S&P do të ulë vlerësimin për Shqipërinë duke patur parasysh këto tregues. Raporti S&P tregon shëndetin e financave të një vendi si dhe mundësinë për të paguar borxhin që ka. /Opinion.al
