Kreu i Grupit Parlamentar të PD-së, Gazment Bardhi, ka reaguar lidhur me Progres raportin e Komisionit Europian, për Shqipërinë.
Në një postim në rrjetet sociale, Bardhi shkruan se ky raport konfirmon shqetësimet e drejta të opozitës për mungesën e lirisë në Parlament.
Teksa përmend situatën me krimin e organizuar dhe Korrupsionin, Bardhi thotë se qeveria e Edi Ramës nuk ka në axhendë luftën serioze ndaj këtyre fenomeneve.
Reagimi i plotë i Gazment Bardhit:
Shqipëria nuk plotëson asnjë standard europian politik, ekonomik dhe social. Skaneri i Komisionit Europian e nxjerr Shqipërinë e drejtuar nga Edi Rama si vendin me sëmundje të rënda të demokracisë.
Raporti konfirmon shqetësimet e drejta të opozitës për mungesën e lirisë në Parlament, për kufizimin e së drejtës kushtetuese për ngritjen e komisioneve hetimore, për përjashtimet arbitrare të deputetëve, për mungesën e përparimit në reformën zgjedhore.
Komisioni Europian vendos gishtin në plagë, kur vlerëson situatën alarmante të korrupsionit dhe krimit të organizuar. Niveli i Shqipërisë renditet nga Komisioni Europian poshtë mesatares në të dyja këto fusha jetike, sepse qeveria e Edi Ramës nuk ka në axhendë luftën serioze kundër krimit dhe korrupsionit. Përmes tyre, Edi Rama ble zgjedhjet dhe zgjat pushtetin e tij, që po rrënon çdo ditë shqiptarët.
Së fundi, e shoh të drejtë shqetësimin e Komisionit Europian për gjendjen e opozitës, prandaj është detyrim për ne që të shndërrohemi në një alternativë të besueshme qeverisëse, duke filluar më së pari në bërjen funksionale të opozitës. Sa më shpejt!
