Komisioni Europian ka publikuar raportin e fundit për sa i përket ecurisë së shteteve si Shqipëria, Bosnja dhe Hercegovina, Mali i Zi, Maqedonia e Veriut , Serbia, Gjeorgjia, Moldavia dhe Ukraina.
Në këtë raport raportohet për vlerësimet për përmbushjen e kërkesave për liberalizimin e vizave nga këto shtete.
Raporti i KE ka arritur në përfundimin se këto shtete vazhdojnë të plotësojnë kërkesat për liberalizimin e vizave, dhe se lëvizja pa viza vazhdon të sjellë përfitime pozitive ekonomike, sociale dhe kulturore për shtetet anëtare të BE-së dhe vendet partnere.
Raporti përqendrohet në detaje në fushat specifike të sigurisë dhe emigracionit ku kërkohet veprim i mëtejshëm. KE i bën me dije Shqipërisë se duhet të luftojë krimin e organizuar, korrupsionin dhe pastrimin e parave.
Gjithashtu theksohet se bashkëpunimi me partnerët duhet të vijojë dhe të shihet me kujdes çështja e azilkërkuesve, pasi numri i shqiptarëve që kërkojnë azil në vendet europiane, ka qenë dhe mbetet ende i lartë.
“Emigrimi i parregullt i shtetasve nga një numër vendesh i vlerësuar është rritur. Kapaciteti për të akomoduar si azilkërkuesit dhe personat që i nënshtrohen një procedure kthimi është i pamjaftueshëm në disa vende të Ballkanit Perëndimor, veçanërisht Bosnjë dhe Hercegovina. Zbatimi i suksesshëm i Marrëveshjeve të Statusit të Kufirit dhe Rojes Evropiane të Kufirit (Frontex) midis vendeve të Ballkanit Perëndimor dhe BE do të ndihmojë në forcimin e bashkëpunimit kufitar dhe parandalimin e hyrjeve të paautorizuara në respektimin e plotë të të drejtave themelore. “Marrëveshjet e mbetura duhet të finalizohen shpejt”,- thekson Raporti./ Opinion.al
