Qeveria e Mbretërisë së Bashkuar “shmangu në mënyrë të vazhdueshme” hetimin për ndërhyrjen ruse gjatë referendumit në BE, thotë Komiteti i Inteligjecës dhe Sigurisë.
Raporti i shumëpritur i Komitetit të Inteligjencës dhe Sigurisë (ISC) thoshte se qeveria nuk po e merrte seriozisht, megjithëse kishte prova për ndërhyrje në referendumin e pavarësisë së Skocisë.
Raporti bën thirrje për “veprim të menjëhershëm” nga qeveria dhe agjensitë e inteligjencës për të adresuar kërcënimin.
Ministria e Jashtme ruse e quajti raportin “Rusofobi”.
Qeveria e Mbretërisë së Bashkuar hodhi poshtë thirrjen e komitetit për një vlerësim të plotë nga agjensitë e inteligjencës për ndërhyrje të mundshme ruse në referendumin e vitit 2016, duke thënë se “nuk kishte parë prova të ndërhyrjes së suksesshme”.
Kryeministria gjithashtu ka mohuar pretendimet se kishte “nënvlerësuar” kërcënimin nga Rusia.
Hetimi i ISC përfshin një numër temash, duke përfshirë fushatat dezinformuese, taktikat kibernetike dhe emigrantët rusë në Mbretërinë e Bashkuar – duke thënë se Mbretëria e Bashkuar ishte një “objektiv kryesor” për Rusinë.
Por shumë nga detajet “shumë të ndjeshme” nuk do të publikohen për shkak të frikës se Rusia mund të përdorë provat për të kërcënuar Britaninë e Madhe.
Komiteti tha që ndikimi rus në Mbretërinë e Bashkuar tani ishte “normalja e re” dhe Mbretëria e Bashkuar ishte “qartazi një objektiv” për fushatat dezinformuese rreth zgjedhjeve të saj.
Por ata thanë se çështja ishte përshkruar si një “patate e nxehtë” – pasi asnjë organizatë nuk ka marrë përsipër të trajtojë ndikimin rus.
Raporti kritikoi agjensitë e inteligjencës për mos ndërmarrjen e veprimeve gjatë referendumit të BE-së, pavarësisht se kishte të dhëna të besueshme që sugjeronin ekzistencën e “fushatave të ndikimit” nga rusët gjatë referendumit të pavarësisë skoceze në 2014, dhe ata më vonë kishin shikuar aktivitetin rus në zgjedhjet e SHBA .
“Sikur pjesët përkatëse të komunitetit të inteligjencës të kishin kryer një vlerësim të ngjashëm të kërcënimit para referendumit të [BE], është e pakonceptueshme që ata nuk do të kishin arritur të njëjtin përfundim si për qëllimin rus, i cili më pas mund t’i ketë çuar ata të ndërmarrin veprime për të mbrojtur procesin ”, thuhet në raport.
Anëtari i komitetit të ISC, Stewart Hosie gjithashtu tha se askush në Qeveri nuk dëshironte të prekte çështjen e ndërhyrjes ruse dhe askush nuk e dinte nëse Rusia kishte provuar të ndërhynte në referendumin e BE në 2016 “sepse nuk donin ta dinin”.
Hosie u tha gazetarëve: “Duhet të ishte bërë një vlerësim i ndërhyrjes ruse në referendumin e BE dhe tani duhet të ketë një të tillë, dhe publikut duhet t’i thuhen rezultatet e këtij vlerësimi.”/ Opinion.al
