Referuar fjalimit të tij në KiE, Kryeministri Rama gjatë një reagimi për emisionin “Opinion”, tha se do të bëjë çmos për ta ndihmuar këtë institucion të dalë nga bataku ku e ka futur ish-komisioneri Dik Marti.
“Mos harroni është një njollë për shqiptarët, për kombin tonë për njerëzit tanë, sepse kjo histori e trafikut të organeve njerëzore për shumë kohë ka shkuar në faqe të para të gazetave, komente të pafundme në kanale e portale dhe ka futur në kokën e njerëzve një ide shumë të gabuar duke e ushqyer me një gënjështër të madhe sterotipin se shqiptarët janë të frikshëm, janë kriminelë janë të të gjithave. Duhet ta dini që ka patur një rast të një personi turist që humbi në majat e maleve duke bërë turizimin malor dhe ambasada përkatëse ka kërkuar një investigim për marrje të organeve. Dhe kur e pyetëm çfarë është ky investigim na thanë: Epo se në Shqipëri ndodh kjo. Çfarë ndodh në Shqipëri? Përsa i përket Kosovës, në fjalën time kam bërë një mbështetje të drejtëpërdrejtë përse Kosova duhet të pranohet në KiE. Kosova nuk ka fuqi të bëjë atë që ne mund të bëjmë. Jo thjesht për Kosovën për shqiptarinë, për ne si popull që nuk mund ta pranojmë këtë damkën, por edhe për Europën, që duhet të provojë se është në gjendje të ketë përulësinë, modestinë, vetëdijen. Gabimet janë pjesë e institucioneve demokratike, por institucionet demokratike ndryshojnë nga ato jodemokratike se kanë virtytin që gabimet e tyre t’i korigjojnë. Do bëjmë çmos t’i ndihmojmë të dalin nga bataku ku i ka futur gjenerali i një ushtrie imagjinare organesh njerëzore të trafikuara”, tha Rama./Opinion.al
