Nga selia e Partisë Demokratike, Enkelejd Alibeaj ka komentuar raportin e Departamentit Amerikan të Shtetit, duke thënë se Rama dhe qeveria e tij arritën ta klasifikojnë Shqipërinë si prodhues dhe eksportues të sasive të mëdha të drogës.
“Shndërrimi i Shqipërisë në parajsën e krimit të organizuar dhe pastrimit të parave është projekti politik me të cilin Edi Rama erdhi në pushtet dhe po mban pushtetin. Raporti më i fundit i Departamentit Amerikan të Shtetit skanon qartë gjendjen alarmante ku ka futur vendin qeverisja kriminale e Edi Ramës. Edi Rama dhe Qeveria e tij kriminale arriti ta klasifikojnë Shqipërinë si prodhues dhe eksportues të sasive domethënëse të marijuanës, kryesisht për përdorim evropian dhe ta kthejë vendin tonë në një vend tranzit për heroinën dhe kokaniën afgane, duke shërbyer si një portë kyçe për shpërndarjen e heroinës nëpër Evropë”, ka thënë Alibeaj.
Gjatë fjalës së tij, ish-deputeti demokrat tha se raporti i DASH thekson se Shqipëria ka probleme me korrupsionin, është burim i kanabisit dhe vend i përpunimit të kokainës dhe se Shqipëria evidentohet si bazë për veprimtarinë e organizatave kriminale që veprojnë në SHBA, Evropë, Lindjen e Mesme dhe Amerikën e Jugut.
Alibeaj deklaroi se zgjidhja e vetme është largimi i Edi Ramës. “Zgjidhja e vetme e mbetur, është vetëm shembja e domosdoshme e këtij pushteti të kriminalizuar, si burimi kryesor i kësaj pasqyre fatkeqe ku e ka zhytur Shqipërinë sot. Shqiptarët janë ngritur në këmbë për të mos e lejuar Edi Ramën që ta shndërrojë zyrtarisht Shqipërinë në një narkoshtet”, u shpreh ai./Opinion.al
Lexo edhe: DASH: Shqipëria gjithnjë e më shumë vend tranzit për drogat e forta
