Emigrimi mbeti një sfidë jo vetëm në Shqipëri, por në mbarë botën. Sipas një raporti të fundit të Bankës Botërore, mbi 184 milionë njerëz, ose 2.3% e popullsisë së botës, jetojnë sot jashtë vendit të tyre të origjinës. Pothuajse gjysma e tyre janë nga vendet me të ardhura të ulëta dhe të mesme.
Raporti i Bankës Botërore për emigracionin konkludon se emigracioni sjell efekte mjaft negative edhe kur anëtarët e familjes përfitojnë nga transfertat e dërguara nga emigrantët.
Emigrantët shqiptarë dërguan 834 milionë euro vitin e kaluar, niveli më i lartë që nga viti 2008.
Ato janë burimi i vetëm financiar për afro 26 për qind të familjeve shqiptare, duke mbajtur gjallë konsumin nëpërmjet përfshirjes financiare të popullsisë, por duke dekurajuar punësimin.
Duke iu referuar Shqipërisë, raporti thekson se largimi i prindërve në emigracion prek drejtpërdrejt fëmijët në sferën sociale. Shkojnë më pak dhe kanë mirëqenie të dobët.
Më tej theksohet se kanë probleme në sjellje si dhe gjendje të vështirë emocionale. Vendet me të ardhura mesatare të larta kanë numrin më të lartë të emigrantëve, por në të kundërt, vendet me nivele mesatare të të ardhurave si Shqipëria dhe Republika Domenikane, kanë normat më të larta të emigrimit krahasuar me vendet e tjera të botës.
Migrimi ekonomik është i lartë, duke e privuar më tej vendin nga talenti dhe fuqia punëtore. Për ata që qëndrojnë, cilësia e jetës është gërryer në zonat urbane, analizoi Banka Botërore.
