Sipas raportit vjetor që Avokati i Popullit ka dorëzuar në kuvend rezulton se megjithëse qeveria nxori nga skema e ndihmës ekonomike me mijëra familje vitin e kaluar, ajo nuk i rrit pagesat për ata që mbetën në skemë.
Në dokument theksohet se në vitin 2018 u vu funksionim sistemi i pikëzimit elektronik, i cili sipas Avokatit të Popullit ka sjellë shumë problematika. Së pari ky sistem solli përjashtimin e 30% të përfituesve nga skema e ndihmës ekonomike. Megjithatë kjo nuk solli përfitime mujore më të mëdha për ata që mbetën në skemë.
“Mirëpo, nëse u përjashtuan nga përfitimi 30% i përfituesve, rritja në masë e ndihmës ekonomike nuk u reflektua me një vlerë të përfillshme, për ta konsideruar këtë shumë dinjitoze në sigurimin e mjeteve më të domosdoshme për të jetuar e jo më pastaj për të folur për qëllimin e saj: zhdukjen e varfërisë dhe riintegrimin në shoqëri”, thekson raporti.
Problematika tjetër që evidenton raporti është moskompensimi financiar për shpenzimet e energjisë elektrike për familjet me ndihmë ekonomike. Kjo ka patur për pasojë uljen e të ardhurave të kësaj shtrese të popullsisë dhe ka përkeqësuar edhe më tej kushtet e jetesës.
Pranë Avokatit të Popullit, rezultojnë të jenë depozituar 80 ankesa në lidhje me këtë problematikë në vitin 2018. Ky është një numër i madh duke konsideruar se në 2017 ishin vetëm 36 të tilla. /Opinion.al
