Katër ditë më parë, portali HashtagAL zbuloi se Ministria e Zhvillimit Urban kishte kaluar një fond prej 517 mijë eurosh me tender jo-publik tek një kompani eventesh për organizim konferencash.
Ky kalim fondi ishte realizuar nga thesari mbrëmjen e Vitit të Ri më 31 Dhjetor 2015, por fondi cilësohej nga monitorimi i portalit si i dyshimtë dhe ministria ende nuk ka bërë publike kontratën dhe specifikimet teknike që do justifikonin këtë veprim.
Instituti APPA (Albanian Platform for Public Advocay) në Tiranë, një organizëm i disa ekspertëve të rinj që monitorojnë aktivitetet e ministrive ka reaguar mbi denoncimin, duke “kryqëzuar” konferencat luksoze të Ministrisë së Zhvillimit Urban për “ndërgjegjësimin mbi territorin”.
Një raport i këtij instituti i siguruar ngaHashtagAL bën skanerin e këtyre konferencave për muajin Nëntor-2015.
Konstatimet e ekspertëve janë pa ekuivok. Ata i cilësojnë këto konferenca si të paqarta dhe pa thelb dhe kritikojnë Ministren Gjermeni për angazhimin në këto konferenca vetëm të militantëve.
“Nga dëgjesat e zhvilluara në Korçë dhe Vlorë për këtë muaj mund të kuptohet se në këto plane është përfshirë, me aq sa deklarohet, praktikisht gjithçka që vendi jonë ka nevojë nga ana infrastrukturore, e planifikimit e integrimit të territorit jo vetëm brenda vendit, por edhe në rajon”, thuhet në raport.
“Projektet nuk janë aq shumë të tillë se sa një konstatim se çfarë ka shkuar keq në zhvillimin e planifikimin e territorit dhe çfarë është e nevojshme të bëhet. Në asnjë lloj mënyre këto “plane’ nuk mund të quhen projekte sepse ato nuk përmbajnë asnjë projekt konkret, në terma afatshkurtër, afatmesëm e afatgjatë, as kontraktor që do i vënë në lëvizje e as plan financiar.”
Ndërsa më tej raporti konstaton se“Një problem më vete janë pikërisht prezantimet e projekteve, të cilat të prezantuara në formën e konsultimeve, janë një shfaqje e paqartësisë që rrethon projektet ku folësit kalojnë nga tema e zhvillimit të parqeve energjitike, të infrastrukturës portuale, te Parqet Natyrore, turizmi e prioriteti i infrastrukturës së biçikletave të gjitha të ngjeshura në 3 minua fjalim (që mund ta aksesoni në videon e sjell te seksioni i Referencave).”
Në fund të përmbledhjes ekspertët e APPA-s i sugjerojnë ministres Gjermeni “që në vend të militantëve e miqve deputetë, të ftojë në këto takime ekspertë të fushës, të cilët të mund të vlerësojnë atë çka supozohet është planifikuar, të ndihmojnë publikun të kuptojë dhe të ofrojnë propozimet e tyre për të korrigjuar dokumentet në fjalë.”
