Kryeministri Rama ditën e sotme ka zhvilluar një takim me fermerët e zonës në Gjirokastrër, ku ndër të tjera ka dialoguar me ta, duke i pyetur për problemet e tyre. Një moment jo i mirë për Ramën ka qenë ai pas pyetjes së njërit prej tyre, që mesa u duk e kapi të pa përgatitur Kryeministrin. Fermeri në fjalën e tij përdori edhe terma fushate dhe ngriti problemin e çmimit që duhet të paguajë për truallin.
Rama ka kërkuar ndihmën e drejtorit të Legalizimit në Gjirokastër, i pranishëm në bashkëbisedim dhe pasi i ka kërkuar shpjegime, e ka urdhëruar të legalizojë 2 stallat e fermerit brenda ditës së hënë.
DEBATI:
Fermeri: Është një handikap i madh, paguhet njësoj për një shtëpi njësoj për një stallë…
Rama: Nuk e kuptova këtë 40 milion për stalla.
Fermeri: Aq kërkohet për një objekt që kërkohet nga një fermer.
Rama i drejtohet drejtorit të ALUIZNIT: Prit njëherë. E kuptova. Është në truall shtetëror. Kur është truall shtetëror nuk duhet të ketë.
Fermeri: Në fakt…
Rama-drejtorit: Si është kjo punë mo drejtor?
Fermeri: Ja…
Rama: Një minutë më ler! O drejtor…
Drejtori: Nuk e di ku e ka gjetur këtë informacion…
Fermeri: Ke dy stalla, një e ke në Antigone…
Rama: U bënë disa çështje. Kjo tarifa së pari nuk është ashtu. Tarifa është vetëm 2 mijë lekë për metër katrorë. S’ka tarifë tjetër. Vetëm për tokën dhe vlen vetëm për biznesin jo për shtëpinë. Ju ju bie të paguani me 200 Lekë metrin katror.
Fermeri: Bëni llogaritë mirë, janë 40 milion lekë.
Rama: 200 lekë shumëzim 2, bëjnë 4 milion, jo 40. Bëji mirë llogaritë!
(Duartorikitet nga fermerët).
Rama-fermerit: Ditën e hënë, ai drejtori atje do të të bëjë legalizimin.
Drejtori: Po, le të vijë…
Rama: Do shkosh ti nuk do vijë ai. Të dy stallat do ia legalizosh e të hënën do më çosh mesazh, u bë. Bëji llogaritë mirë se qenka edhe inxhinjer.
Fermeri: Jam pensionist.
Rama: Ti moshën e ke në pension se punon më shumë se ai drejtori. ( I drejtohet edhe njëherë drejtorit) Drejtor, u kuptuam?
Rama-Fermerit: E pra, 200 lekë metri katror, jo 40 milion. Se ti edhe në Manhatan ta kishe stallë, s’do kushtonte kaq shumë!
