Kryeministri Edi Rama, në një konferencë për mediat, i bëri thirrje Kosovës që të shpallen menjëherë zgjedhjet në Veri.
Po ashtu ai theksoi se policia duhet të tërhiqet nga Veriu, pasi sipas Ramës ajo që mund të ndodhë nëse situata nuk ç’tensionohet mund të jetë e rëndë.
“Në vend që palët në ulen për dialog, asnjëri as tjetri nuk janë për të zgjidhur problemin real. Unë nuk jam këtu për të bërë komente për Albin Kurtin, e kam mbështetur në të gjithë procesin e dialogut, e kam mbështetur edhe kur e sulmuan si tradhtar kur u ul me Vuçiçin në tavolinë, sepse kjo është rruga për të arritur njohjen e ndërsjellë që po luftojmë të gjithë. Ndërkohë që merremi me policinë dhe 4 godina bosh, ku kryetarët e kanë kryer misioni e tyre, duhen shpallur zgjedhjet e reja menjëherë për të qetësuar situatën, policia të tërhiqet” –tha kryeministri.
Ndër të tjera, Rama tha: Nuk i quaj aleatët ‘ndërkombëtarë’, ata janë të zotët e shtëpisë në Kosovës si askund tjetër, sepse ata e kanë krijuar atë shtëpi. Për sa kohë ajo shtëpi nuk është njohur plotësisht, atëherë ata janë limfa vitale e asaj shtëpie. Nëse ata i kthejnë shpinën, ajo shtëpi futet në ditët e veta më të zeza. Nëse trupat e huaj do të marrin veriun e Kosovës çështja do kthehet në tryezë pas kush e di sa vitesh./ Opinion.al
