Pas miqësisë së prishur me njëri-tjetrin, Edi Rama ka hequr Koço Kokëdhimën nga detyra e të deleguarit për Qarkun e Gjirokastrës. Zyrtarisht mësohet se ky vendim është marrë për faktin se Kokëdhima nuk paraqitej në Gjirokastër prej mbi 3 muajsh. Në vend të tij, Kryesia e PS-së ka vendosur të delegojë ministrin për Çështjet Vendore, Bledi Çuçi.
Koço Kokëdhima nuk është më i deleguari i Kryesisë së Partisë Socialiste në qarkun e Gjirokastrës. Vendimi mësohet se është marrë në mbledhjen e fundit të kësaj strukture. Në vend të Kokëdhimës, kryetari Rama ka preferuar të dërgojë ministrin për Çështjet Vendore, Bledi Çuçi, vendim që është mbështetur nga Kryesia e Partisë Socialiste.
Ndërkohë Partia Socialiste ka nisur organizimin e strukturave të saj në bazë në funksion të zgjedhjeve të vitit të ardhshëm. Për këtë, sekretari i Përgjithshëm, Gramoz Ruçi, ka urdhëruar ngritjen e një grupi pune në çdo qark, me detyrën për evidentuar e atyre që cilësohen si emigrantë të brendshëm, ose zgjedhësit që votojnë në një tjetër qytet nga ai ku jetojnë.
