“Pastrojmë Shqipërinë në një Ditë”, eshte turi i kryeministrit Rama dhe është ndalur sot në qytetin e Kukësit. Vendimin për të bërë zero taksën e biznesit të vogël, Rama e ka quajtur një ndihmë mjaftë të vyer për qytetarët, duke thënë se kjo shërben si nxitje për punësimin.
“Qeveria bëri zero taksën e biznesit të vogël, që do të thotë jo vetëm nxitje e punësimit, por një arsye shumë e fortë për të promovuar shembullin e tyre. Ai që do punë, e krijon edhe vetë”, tha shefi i qeverisë. Më tej Rama foli për mbështetjen që po i jep sektorit të bujqësisë, duke thënë se bankat kanë në dispozicion 300 milionë euro për kreditë e fermerëve.
“Kemi rritur kapacitetin e mbështetjes së fermave bujqësore dhe kemi krijuar kushte që qindra dhe mijëra të tjerë të punojnë, sepse prodhimi i tyre nuk shkon dëm sepse kanë se ku ta shesin. Por kjo nuk është e mjaftueshme, dhe për këtë kemi krijuar një fond garancie për bujqësinë, që do të thotë se qeveria, që të garantoj kreditimin me kushte të favorshme të të gjithë të atyre që duan të jetojnë me punë në fshat, të investojnë për punësimin në fshat, që duan të kalojnë nga një fazë mbijetese në një fazë zhvillimi të ekonomisë së tyre. Janë 300 milionë euro që janë vënë në dispozicion të tyre”, vijoi Rama.
