Në aktivitetin e zhvilluar ditën e sotme, ku kryeministri Edi Rama prezantoi programin e PS për pagat, taksat dhe biznesi, kreu i qeverisë foli edhe për taksën e sheshtë.
Rama e konsideroi taksën e sheshtë, pjesë e programit të Partisë Demokratike një fantazmë kërcënuese për të gjithë ata që fitojnë më pak se 1.2 milionë në muaj.
“Dua të ndalem te rikthimi në skenë e një fantazme kërcënuese për të gjithë ata që marrin më shumë se 300 mijë dhe më pak se 1.2 milionë, taksa e sheshtë. Taksa e sheshtë është rreziku më i afërt, sepse me taksën e sheshtë të propozuar nga KÇK, të gjithë ata që kanë një pagë deri në 1.2 milionë do të duhet të paguajnë më shumë se sa paguajnë sot. Dëgjoni një shifër lemeritëse se çfarë u ka barë taksa e sheshtë atyre që paguhen më pak se 1.2 milionë.
Më tej kryeministri Rama, bëri një bilanc të taksave që ka marrë nga të pasurit në 8 vite, ndërsa më tej tha se sipas programit të PD oligarkëve nuk do tu merret më 15 për qind siç u merret sot, por do të taksohen njësoj si ata që fitojnë më pak.
“Kur ne shporrëm taksën e sheshtë hapëm një kapitull të ri për të ardhurat personale të 97 për qind të të punësuarve, të cilëve u kemi lënë 12.5 miliardë lekë në xhep. Ne 8 vjet janë 100 miliardë që nuk i ka mbledhur më shteti, por i ka lënë në xhepin e çdo të punësuari. Le ta bëjnë vetë llogarinë, të tërë ata që e kanë pasur pagën nën 1.2 milionë në xhep, se sa i linin shtetit nga paga, dhe sa i lënë nga viti 2014. Vijnë këta edhe u thonë Shqipëria fiton po na dhatë votën, prandaj do na jepni 9 për qind taksë. Oligarkëve nuk do tu marrin më 15 për qind siç u marrim ne sot, por do tu marrin njësoj si ata që fitojnë më pak. Kjo është taksa e sheshte, vë në të njëjtën barrë fiskale edhe më të dobëtit, që fitojnë më pak, edhe më të fortët, që fitojnë më shumë.
Për dikë që fiton 500-600 mijë lekë 9 për qind janë shumë. Po si ka mundësi në këto kohë kaq të vështira, këta kanë guximin që të thonë që Shqipëria fiton duke u ulur nga 15 për qind në 9 për qind, taksën ndaj atyre që mi kanë hedhur mua në kurriz.
E mbi të gjitha si mund të tallen deri në fund më ata të verbuar dhe të shurdhuar politikisht, më ata që mendjen e kanë tapë dhe i votojnë akoma. Unë shoku i oligarkëve u kam marrë në këto dy mandate mbi 1 miliardë taksa, dhe këta me ngritën si shërbëtor të tyre, ndërsa këta Robin Hood-ët do t’ua ulin në 9 për qind. Si furra e bukës si ndërmarrja e oligarkut 9 për qind!”, tha Rama./Opinion.al
