Ish-kryeministri, Sali Berisha foli nga foltorja e Kuvendit për intervistën e ministrit të Jashtëm grek, Nikos Dendias, pas vizitës që ai pati në Shqipëri.
Ky i fundit tha për mediat greke se presidenti Ilir Meta nuk ka dhënë autorizimin për nisjen e negociatave me Greqinë për çështjen e detit.
Sipas Berishë, kjo deklaratë është rrjedhojë e informacioneve që Dendias ka marrë nga kryeministri Rama në një kohë kur nuk është bërë asnjë kërkesë në Presidencën shqiptare më lidhje me marrjen e autorizimit.
Ai tha se ky është një akt i ulët dhe se nuk mund t’i ankohesh një ministri të huaj, kur fillimisht nuk ke informuar publikun dhe qytetarët shqiptarë.
“Këto ditë u publikua intervista e ministrit të jashtëm të Greqisë, në të cilin Nikos Dendias informon kombin e tij, por gjithë botën se Rama a paditur tek ai Presidentin e Republikës. Unë do u lutesha qytetarëve shqiptarë ta arsyetojnë vetë këtë akt. Unë nuk e kam shumë të vështirë të vë shumë epitete, por po sqaroj qytetarët që Presidenti që duhet të japë autorizimin për fillimin e negociatave për gjyqin në Hagë për çështjen e detit.
Edi Rama nuk i ka dërguar deri më sot asnjë kërkesë Presidentit për autorizimin. Një kryeministër që padit presidentin e vet, kur nuk i ka dërguar kërkesë, gjykojeni vetë çfarë mund të jetë. Niko Dendias i ka përmend disa herë disa lidhje e errëta në Korfuz. Unë nuk i di ato.
Paditja e presidentit përbën një akt që e denoncoj me forcën më të madhe. A mund të ecet me një njeri i cili fut thika, mashtron paskrupull. Nëse presidenti i republikës nuk do të firmoste, ai duhet të njoftonte popullin shqiptar, nuk duhet të ankohej te ministri i Greqisë”,-tha Berisha.
