Sot po zhvillohet dita e tretë e Kongresit të Partisë Socialiste, ku në fokus do të jenë të rinjtë. Gjatë fjalës së tij në Bulevardin “Dëshmorët e Kombit”, Rama i ka dërguar një mesazh në distancë Presidentit Ilir Meta, i cili ka organizuar një manifestim ditën e nesërme.
Kryeministri tha se vendi nuk mund të jetë peng i besëlidhjes apo “besëlikes”, por duhet të ecë përpara. Rama tha gjithashtu se; “S’mund të jetë debat që të marrim vendin peng, debati që ka marrë mediat peng për gjithë këto kohë, besëlidhja dhe besëlikja, nuk është ky debati. Kush është me besëlidhjen, kush është me besëliken. Ky vend nuk është peng i atyre që shfaqen në televizor sikur janë ata dhe pas atyre nuk ka asgjë tjetër”.
Duke folur para të rinjve, me këshilla se si duhet të ndërtojnë rrugën e komunikimit me njerëzit, kryeministri ‘thumboi’ sërish Metën, kur tha se liria për t’u shprehur i jep mundësinë kujtdo ta keqpërdorë atë dhe të flasë publikisht gjëra të paqena, duke pasur parasysh këtu, akuzat për grusht shteti që Meta ka bërë ndaj mazhorancës.
“Duhet nxjerrë një mësim i rëndësishëm, duhet ndërtuar rruga se si gjërat të thuhen dhe të ndërtohen. Ne kemi një situatë demokratike që në nivelin e gjërave që thuhen nuk na e kalon njeri nga pikëpamja e lirisë. Liria për të thënë deri edhe çmenduritë më të mëdha, është e pakufishme. Mjafton të dëgjosh këtë që keni mbrapa ju, për të kuptuar se deri ku shkon në Shqipëri liria për t’ia futur kot. Dhe askush nuk të thotë gjë. Dhe kjo është në të gjitha nivelet. Larg qoftë të shohësh ndonjë debat në televizor për të parë se deri ku shkon gjuha dhe se çfarë lirie kanë njerëzit për ta shthurur gjuhën. Cilësinë demokratike të vendit nuk e përcakton fakti se sa shumë flet, por sa ndërveprim ka mes atyre që flasin e dëgjojnë. Se këtu është bërë “fol-fol, por kush po të pyet”. Në të gjitha nivelet. Ju keni një mundësi për të krijuar një komunikim të ri duke kapërcyer modelin tradicional. Nëse kalohen dhe 4 vjet si FRESSH-i tani nuk ka çfarë iu duhet FRESSH-i fare. Kjo vlen për organizimin, se të gjithë ju jeni të vlefshëm dhe i duheni të ardhmes politike të këtij vendi. Jo për t’u bërë të gjithë politikanë, se besoj nuk është kjo arsyeja pse jeni të gjithë këtu. Politika është shumë e bukur se është mundësia për të ndarë me të tjerët energji dhe ide në funksion të punëve që vetëm asnjë njeri nuk i bën dot. Politika për këtë ka lindur. Që njerëzit bashkë të bëjnë gjëra që nuk i bëjnë dot”, u shpreh kryeministri Edi Rama, duke iu drejtuar të rinjve të FRESSH-it./ Opinion.al
