Koncesioni për HEC-et në Valbonë nuk do të anulohet, edhe pse shoqëria civile dhe banorët vazhdojnë protestat prej muajsh. Rama ka deklaruar sot në Parlament se “2 HEC-e do të ndërtohen mbi këtë lumë”.
Ai tha se Berisha kishte dhënë leje për ndërtimin e 11 të tillë, por 9 janë anuluar. Gjithashtu ai tha se edhe në Theth u anuluan 6 HEC-e.
“Po ju sqaroj se kemi mbajtur rigorozisht në vëmendje dhe procedurën për Valbonën dhe dy HEC vetëm 2, jo 11, të cilat kanë marrë dritën jeshile për shkak pamundësie të plotë ligjore për të bërë anulimin janë kaluar në filtra njëri pas tjetrit për të garantuar me ekspertizë ndërkombëtare standarde mjedisore dhe cilësi projektimi inxhinierik të njëjtë me ata që vazhdojnë të ndërtohen në Evropën e veriut”, tha Rama.
Më tej, iu drejtua qytetarëve që ndjekin live parlamentin: Për publikun po sqaroj se kur dëgjoni fjalën hidrocentrale në Valbonë, mos parafytyroni diga. Nuk do të ndërtohen diga. Nuk do ndërtohen strukturat që secili i imagjinon kur flitet për një hidrocentral sepse teknologjia e përdorur është krejt tjetër, dhe peizazhi është krejtësisht i pacenuar”, tha Kryeministri.
Deklarata e Ramës erdhi si përgjigje ndaj kërkesës së deputetes demokrate të Tropojës, Mimoza Hajdarmataj.
Në fjalën e saj, znj. Hajdarmataj u shpreh: “Z. Kryeministër si dashamirës i alpinëve, të ftoj të vizitosh për here të parë Valbonën, meqenese Veriun e ke cilësuar gjithmonë magjik. Shko dhe thuaju në besë të malësorit, nëse je për një Valbonë turistike apo energjitike. Sa për projektin e fasadës urbane unë them se ajo sjell zero punësim, zero të ardhura, Sa për rrugën e Valbonës atë jua ka bërë Sali Berisha sikurse dhe rrugën e Kombit. Të falenderojmë që po na e bën të bukur qendrën e Tropojës për shëtitje, por kjo nuk sjell të ardhura për tropojanët që jane në mjerim, të papunë e të pashpresë”.
