Kryeministri Edi Rama, ditën e sotme nga Durrësi, iu bëri thirrje të rinjve që shpenzojnë 30 mijë paund për të kaluar në Angli, t’i përdorin këto para për të zhvilluar agroturizëm në Kukës. Sipas tij të ardhurat e fituara nga agroturizmi do të jenë më të larta se ato që fitojnë nga puna në të zezë në Angli.
“Të gjithë ata që paguajnë mbi 30 mijë paund për të marrë rrugët e frikshme të emigracionit klandestin duke ia lënë të gjitha kursmet në dorë trafikantëve në kërkim të një parajse që nuk kanë për ta gjetur në Angli, mund të bëjnë ekonominë e tyre në Kukës. Këtë nuk e them bazuar në një ëndërr që kam parë me sy mbyllur, por me realitetin e shumë agroturizmave që kam parë. Jemi gati të mbështesim të gjithë të rinjtë në Kukës që janë gati për agroturizëm. Edhe ata që kanë kthyer shtëpinë e gjyshërve në agroturizëm, fitojnë shumë më shumë se ata në të bardhë e të zezë në Angli”, tha Rama./Opinion.al
