Kryeministri Edi Rama është tallur sot me kryetarin e PD-së i cili ka akuzuar kryeministrin nga Berati se ka mbyllur disa universitete.
“Këta janë politikanët e Kristalit, janë politikanët e Vitrinave. Shkon Luli në Berat dhe u thotë “Edi Rama ju ka mbyllur universitetin”. E dini si quhet ai universitet? UFO, UFO quhet”, tha Rama gjatë mitingut në Fier.
Në fakt, në universitetin UFO apo “Albanian University” ka bërë studimet në programin master edhe ish-ministrja e Arsimit, Lindita Nikolla. Ja çfarë shkruan vetë Nikolla për eksperiencën e saj tek UFO.
“Disa media kanë raportuar se dhe unë kam qënë “viktimë” e sistemit të degraduar arsimor, pasi kam ndjekur një master në “Albanian University”.
Po, është e vërtetë. Në vitin 2008 kam ndjekur një kurs të veçantë master, të ofruar nga ky universitet në bashkëpunim me qeverinë e kohës. Një kurs enkas për zyrtarë të administratës publike dhe të zgjedhur vendorë, siç isha edhe une.
Më interesoi programi në një fushë të re, në të cilën unë punoja, por edhe trupa e zgjedhur e profesorëve për këtë program. Rezultatet e mia ishin të shkëlqyera, por thelbi nuk është ky.
Këtë informacion unë e kam ndarë vetë me publikun. Problem do të ishte nëse unë do të kisha favorizuar universitetin në fjalë. Dhe përgjigjja është e prerë, jo. “Albanian University” është trajtuar me të njëjtat standarte si çdo institucion tjetër arsimor. Dhe është kjo arsyeja pse është propozuar masa për pezullim të aktivitetit, meqë nuk plotëson kushtet e parashikuara në ligj.
Unë jam krenare për reformën që kemi ndërmarë dhe për një gjë jam e sigurt. Nuk do të ndalem përpara asnjë pengese për të çuar deri në fund këtë reformë, që pritej prej vitesh nga çdo shqiptar”, ka shkruar Nikolla.
