Mazhoranca kërkon të shkarkojë kryetarin e Komisionit Qendror të Zgjedhjeve, Klement Zguri. Po kështu në korridoret politike flitet edhe për zëvendësimin e Prokurorit të Përgjithshëm, Adriatik Llalla. Këto ndryshime pritet të ndodhin javën tjetër, pasi këtë të enjte nuk do të ketë seancë plenare.
Sakaq mësohet se mëngjesin e sotëm, në orën 08:30 Kryeministri Edi Rama po zhvillon një mëngjes pune me deputetët socialistë të Komisionit të Ligjeve. Tema e diskutimit mësohet se është pikërisht shkarkimi i kreut të KQZ dhe zgjedhja e Prokurorit të ri të Përgjithshëm.
Në 4 Dhjetor, Llallës i mbaron mandati në krye të institucionit të akuzës, por ende nuk kanë nisur procedurat për Kryeprokurorin e ri.
Bazuar te Reforma në Drejtësi, Këshilli i Lartë i Prokurorisë ka të drejtën e hapjes së procedurës dhe dërgimit në Kuvend të një liste me kandidatët për Prokuror të Përgjithshëm. Por vonesa e ngritjes së Këshillit të Lartë të Prokurorisë mund të sjellë përplasje mes palëve politike.
Dy janë rrugët që do të ndiqen; ose do të zgjatet mandati i Llallës ose parlamenti do të ndërhyjë përmes një mekanizimi ekstra ligjor për të komanduar një Kryeprokuror deri në krijimin e institucioneve të reja të KLGJ dhe KLP, thanë ekspertë të ligjeve.
