Kryeministri Edi Rama u prit sot nga homologia italiane Giorgia Meloni.
Takimi kokë me kokë i kryeministrit Rama dhe homologes Meloni në Palazzo Chigi, u pasua nga një takim i përbashkët mes dy delegacioneve respektive.
Gjatë takimit u rikonfirmua “miqësia tradicionale Shqipëri – Itali dhe vullneti për të thelluar bashkëpunimin e shkëlqyer mes dy vendeve, ku padiskutim ka një potencial të madh për të bërë shumë më tepër akoma”.
Forcimi i mëtejshëm i marrëdhënieve në fushën ekonomike, ishte një tjetër temë e diskutuar gjerësisht në takim, ku Italia si partnere strategjike e Shqipërisë, ka një rol tejet të rëndësishëm në këtë drejtim edhe përmes prezencës gjithnjë në rritje të sipërmarrjeve italiane në vendin tonë.
Gjithashtu mësohet se gjatë takimit u diskutua mbi mundësitë e investimit që ofron Shqipëria në shumë sektorë potencial, si energjia, infrastruktura, bujqësia, e veçanërisht turizmi, i cili sipas autoriteteve vendase, këtë vit shënoi një rekord të vërtetë rritjeje, duke u kthyer në një nga fushat më atraktive për investime.
Sa i përket integrimit europian të Shqipërisë, në takim u theksua se Italia do të vijojë të mbështesë fuqishëm procesin, në të gjitha etapat e tij, ashtu si deri më tani.
