Në prag të nisjes së vitit të ri shkollor, kryeministri Edi Rama zhvilloi një mbledhje virtuale me drejtuesit e Drejtorive Rajonale dhe zyrave arsimore vendore.
Kreu i qeverisë tha se “shkollat do të funksionojnë me një, dy dhe tre turne”.
“Për shkollat me numër të madh nxënësish, patjetër që mësimi do të zhvillohet me 1 deri në 3 turne dhe orët 30-minutëshe. Asnjë klasë nuk duhet të ketë më shumë se 20 nxënës”, u shpreh Rama.
Rama shtoi se çdo shkollë do të ketë edhe një person nga sistemi i shëndetit publik:
“Të gjitha institucionet që po marrin masat për nisjen e vitit të ri shkollor janë në një sfidë të jashtëzakonshme jo thjesht për të nisur, por për të vazhduar dhe mbaruar një vit shkollor shumë më të vështirë se gjithë të tjerët. Prandaj, pas trajnimit të vazhdueshëm, pajisjen me bazën materiale të nevojshme (detergjentë, doreza, maska etj.), do të ketë edhe një person nga sistemi i shëndetit publik pranë shkollës. Këta persona duhet të jenë kontakti i përditshëm për shkollat. Duhet këmbim informacioni dhe mbështetje për ta”, nënvizoi Rama./Opinion.al
