Për më shumë se 1 orë e gjysmë, kryeministri Edi Rama ka zhvilluar një takim me ambasadorët e akredituar në vendin tonë. Takimi që nisi rreth orës 11:00 kishte si diskutim, situatën e fundit politike, pas vendimit të presidentit Ilir Meta për anulimin e datës së zgjedhjeve lokale.
Shefi i qeverisë kishte kërkuar një takim urgjent me ambasadorët e huaj, me seli në Tiranë, për t’i sqaruar në lidhje me ato që maxhoranca i quan shkelje kushtetuese të Presidentit.
Partia Socialiste njoftoi se ka vendosur të nisë procedurat për shkarkimin e Presidentit Iir Meta. Eshtë hera e parë që në Shqipëri, Parlamenti do të ndërmarrë një hap të tillë ekstrem, i cili pason vendimin e Kreut të Shtetit për të anulluar datën e zgjedhjeve vendore të parashikuara për më 30 Qershor.
Procedurat për shkarkimin e Presidentit nisin me kërkesën e një të katërtës së deputetëve, ose 36 prej tyre, ndërsa vendimi duhet të merret me të paktën dy të tretat ose 93 vota, të cilat shumica e vetme nuk i ka. Sidoqoftë, edhe nëse parlamenti e aprovon, fjalën e fundit do të duhet ta thotë Gjykata Kushtetuese, e cila për momentin është jashtë funkzionit, me vetëm 1 nga 9 anëtarët e saj. / Opinion.al
