Kryeministri Edi Rama në një takim të zhvilluar me fermerët në Fier këtë të shtunë deklaroi se Shqipëria synon që të përfitojë 500 milionë Euro nga eksportet e frutave dhe perimeve.
Gjatë fjalës së tij, Rama theksoi se vendi ynë po punon dyfishin e asaj që punonte kur PS erdhi në pushtet.
“Është e dhimbshme që edhe një kokërr mollë, edhe një kokërr qepë, edhe një gram qumësht i prodhuar me vështirësitë e veta, të hidhet. Por ka një të vërtetë tjetër. Që ato produkte që dalin në televizor duke u hedhur, ndërkohë që nuk dalin në televizor ato produkte të tjera që eksportohen, janë shëmbëlltyrë e të ndenjurit mbrapa pa dashur për të kuptuar atë që shumica dërrmuese e fermerëve e kanë kuptuar. Atë që keni kuptuar ju këtu, atë që kanë kuptuar të gjithë fermerët nga Veriu në Jug dhe që sot falë tyre ne synojmë 500 milionë Euro eksporte nga 130 milionë Euro që eksportonim kur ne nisëm këtë rrugë. Po synojmë të arrijmë këtë vit gjysmë miliard Euro eksporte frutash, eksporte perimesh, eksporte produktesh të punës më tokën, të një Shqipërie që sot ndryshe nga çfarë tregohet në pasqyrat e deformuara të televizorëve pas të cilave fshihen pronarë që shantazhojnë qeverinë për të përfituar në mënyrë indirekte para, tender, leje ndërtimi, është një Shqipëri që punon dyfishin që punonte kur ne nisëm detyrën. Ne i vumë në dispozicion atë gjë që vetëm shteti mund ta vendosë në dispozicion, ujin. Sot ne ndihemi mirë sepse shikojmë që bujqësia, fshati shqiptar ka të ardhme, krejt e kundërta e asaj që predikohet”, u shpreh Kryeministri Edi Rama.
