Në një takim elektoral të zhvilluar këtë të hënë në Belsh kryeministri Edi Rama ka ironizuar kandidatin e koalicionit “Bashkë Fitojmë”, Luçiano Boçin për Bashkinë Elbasan për të cilin thotë se është zar i Sali Berishës dhe Ilir Metës.
Ndër të tjera Rama tha se Boçi i ngjason me Bashën, por në ndryshim nga ky i fundit, Boçi fle më pak gjumë dhe kështu, sipas kryeministrit gënjen më shumë.
“Dy zara, dy njerëz me dy zara, që hedhin zarat të kapin ca të kapin në një bixhoz që është vetëm rezultat i dëshpërimit dhe halleve personale. S’ka lidhje me këto që ne themi këto. Duhej 1 orë e 30 minuta me ardh nga Elbasani në Belsh, sot është 25 minuta. Nga aty ka dal njëri. Unë nuk merrem me kundërshtarët e vendosur si kukulla ku është hedh zari. Po ai është simbol. Gjigand. Luluç Boçi. Ai është figura e një komedie të madhe. Më kujton zonjën nga qyteti, atë Koçin. Ju kujtohet Koçi që e morën për ta bërë dhëndër në fshatin e vogël dhe lemerisi gjithë dynjanë. Ky është zotnia nga qyteti që e filloi fushatën duke firmos një kontratë. Kontrata e parë dhe fundit në historinë e zgjedhjeve në botë, ku një kandidat firmos me statusin kryetari i ri i bashkisë. Nuk ka kryetari i ri i bashkisë ose i vjetër, ose je ose nuk je kryetari. Ku firmosi për të sjellë 400 mln investime në Elbasan me një konsulent nga Bari që nuk figuron asgjëkund, një skenë filmi i zotnisë nga qyteti. Edhe në pamje po ta shohësh. Mua më pëlqen se më heq edhe mallin e Lulit. Ky është më lart. Ky është një variant i Lulit që nuk fle as gjumë. Ai të paktën flinte gjumë edhe rrente më pak. Ky nuk fle as gjumë, edhe kur mbyll sytë rren. Imagjino të punosh me këta njerëz. Po ua dhe zyrën të përplasin derën në fytyrë dhe aty brenda në zyrë të kapin ca të kapin. Kjo është situata. Këtu s’bëhet fjalë fare, se s’do kthehemi tek dominoja. Donimo luajnë pleqtë, të moshuarit, njerëzit që kanë punuar gjithë jetën dhe ju takon të luajnë domino. Po s’mund të luajë domino kryetari i bashkisë, mendo të vijë ndonjëri që luan domino në buzë të liqenit”, tha Rama.
