TIRANE- Eshtë prezantuar sot projekti për stadiumin Qemal Stafa që tani e tutje do të quhet Arena Kombëtare. Kryeministri Edi Rama duke folur në këtë aktivitet tha se federata dhe as shteti s’do shpenzojnë asnjë lekë.
“As Federata për Arenën Kombëtare nuk do shpenzojë asnjë qindarkë, pasi do jetë një partneritet publik-privat. E rëndësishme është që do sjellim shumë shpejt në kryeqytet një investim prej 50 mln euro, që do ta bëjë kompania private”, u shpreh Rama.
Më tej ai shtoi se “Shqipëria do ketë një stadium të standardeve të larta evropiane. Një stadium ku të luajë jo vetëm kombëtarja, por mundësisht edhe një finale e Superkupës së Europës apo Europaleagues, dhe do t’ia dalim, duke patur një stadium nga më të bukurit në Europë.”
Duke iu përgjigjur kritikëve, që thonë se stadiumi nuk do të sjellë bukë për shqiptarët, kryeministri tha: “Në fakt stadiumet sjellin edhe bukë”.
“Mjafton të shikoni impaktin në ekonominë lokale të Elbasanit nga “Elbasan Arena”. Stadiumi i ri “Arena Kombëtare” do të ketë një influencë të rëndësishme në ekonominë e kryeqytetit. Do të jetë një hapësirë e gjallë që do funksionojë përditë. Një qendër e rëndësishme e jetës së kryeqytetit, siç janë sot stadiumet.”
Ne shmangëm një zgjedhje që ishte e pamundur. Shpresoj që arkitekti, i cili sapo ka përfunduar të dytin stadium modern në Udine, të bëjë një prezantim të projektit, i cili nuk duhet të jetë vetëm për një ditë, por për 7 ditë”, tha Kryeministri Rama.
