Kryeministri Edi Rama ka shuar zërat, se pas Asamblesë Kombëtare do të ketë ndryshime në qeveri. Pyetjes së gazetarëve për ndryshime në qeveri, pas mbledhjes së kryesisë së PS-së, Rama iu përgjigj: “Ndryshime ne qeveri? Pse? Nuk ka ndryshime në qeveri, janë fantazi që burojnë nga temperaturat e larta. Nuk kam deklaruar që do ketë ndryshime, kam thënë që janë një sërë detyrash që nuk janë bërë. Nëse janë bërë nuk ka ndryshime”.
Sa i përket aksionit të opozitës, kryeministri tha se janë në rrugën e vetëpërjashtimit.
“Ata do të ndëshkohen nga vetëpërjashtimi dhe në procesin e vetëvrasjes do bërtasin fitore dhe po bërtasin fitore. Fitore të tilla paçin gjithmonë, ajo që mbetet është rezultati i vullnetit sovran të popullit shqiptar”, theksoi Rama.
Në lidhje me mesazhin që ai i kishte dërguar presidentit Meta, të cilin e lexoi live në një konferencë për gazetarët pak ditë më parë, e sipas kreut të shtetit flitej për eliminimin e dy partive opozitare, kryeministri tha: “Nuk ka nevojë për plane për të eliminuar opozitën, është më kapacitet të plotë për tu vetë eliminuar në një rrugë që e kanë zgjedhur vetë qorrazi. Ne do ti qëndrojmë bësnik të gjithëve, edhe atyre që na votuan edhe atyre që nuk na votuan”.
Rama premtoi se do të bëhen zgjedhje brenda Partisë Socialiste, ndërsa për zgjedhjet parlamentare tha se do të mbahen në qershor 2021, duke hedhur poshtë idenë e zgjedhjeve të parakohshme. / Opinion.al
