Pas zërave se kishte pësuar një parainfarkt dhe po kurohej në Berlin, kryeministri Edi Rama është shfaqur në një video-live në Facebook nga zyra e tij. Kryeministri, i cili prej disa ditësh nuk shfaqej në publik, tha se ka qenë në Berlin në një takim informal dhe jo për t’u kuruar.
“Siç e shihni jam mirë, jam në zyrën time në Tiranë dhe jo në spital në Berlin. Njerëz jemi, edhe mund të sëmuremi, por nuk ishte ky rasti. Në Berlin isha jo për shëndetin tim, por për të takuar miq e partnerë të Shqipërisë. Për të pastruar imazhin, për të kërkuar mbështetje për çeljen zyrtare të bisedimeve për anëtarësimin. Nuk ishte një vizitë zyrtare, ishte një vizitë jo-formale”, tha ndër të tjera në komunikimin e tij.
Sajesën për sëmundjen e tij, Rama e quajti produkt të kazanit të opozitës dhe shprehu keqardhjen për nivelin se ku kanë rënë kundërshtarët politikë. Rama paralajmëroi se do t’i hedhë në gjyq ata që kishin shpifur për sëmundjen e tij. Kujtojmë se i pari që dha lajmin për shtrimin në spital të Edi Ramës, ishte ish-deputeti i demokrat Klevis Balliu.
“Fatkeqësisht shumë miq këtu në Shqipëri dhe jashtë, që qeshën me këtë historinë e sëmundjes. Ataku në zemër sajesë e kazanit të opozitës tonë rrugë humbur, kjo do të thotë të prekësh fundin. Me keqardhjen për shqetësimin që është krijuar, nuk më mbetet gjë tjetër vecse ti mëshiroj. Do u kërkoj që të përgjigjen në gjyq dhe të përgjigjen për sajesën”, tha Rama.
Ai u ndal edhe në punimet e Kongresit të Partisë Socialiste nesër, duke thënë se do të ndizen motorët e fushatës.
“Në fund të ditës idetë për politikë mund të na ndajnë, por gjaku na bashkon si shqiptarë. Kështu, që gëzuar me këdo t’iu dojë zemra. Sot po përgatitem për Kongresin nesër, iu ftoj të vini në orën 12:00 në sheshin Nënë Tereza, për ciklin bashkia që duam. Nesër është dita e ndezjes së motorëve elektoralë për të gjitha bashkitë. Ne jemi gati të bëjmë atë që dimë, rruga e ndryshimit është e hapur dhe e prekshme, por edhe kudo që duam ta hapim në bashkitë e shkreta që kanë mbetur peng i kundërshtarëve tanë, por do të flasim nesër. Kushdo që dëshiron është mirëseardhuar”, u shpreh kryeministri./Opinion.al
