Parlamenti sot i është kthyer normalitetit dhe debatohet për çështjen e negociatave. Pas Ditmir Bushatit fjalën e ka marrë Luan Rama i LSI, i cili tha se së paku të gjithë sot duhet të kishin kërkuar ndjesë nga Kryeministri e deri tek deputetët. Sipas tij, qeveria dhe ministri i Jashtëm po përpiqen të shtrembërojnë të verteten pasi Shqipëria nuk mori datë për hapjen e negociatave. “Nëse ju qershori i 2019 ju duket datë është punë për ju, por unë e di se qershori është muaj”, tha ai.
Më tej Luan Rama sfidoi kryeministrin Edi Rama duke thënë: “Nëse BE ka përcaktuar një datë se kur hapen negociatat me Shqipërinë unë jap dorëheqjen, në të kundërt duhet të dorëhiqeni ju dhe ministri juaj!”.
Ndër të tjera Luan Rama u shpreh: “28 qershori 2018 nuk është data e dhënien së negociatave, dhe na është dukur 28 si data e triumfit të madh siç na është thënë siç na është trembetuar. Hamzaizëm tipik por pa çallmën otomane. Nuk është miratuar rekomandimi për çeljen e negociatave, çfarë fiton Shqipëria sot meqë e quani ditë fitoreje. Shtyrje me 1 vit, edhe atëherë të shohim ose jo…”
Çfarë tha ministri Bushati
Ministri i jashtëm, Ditmir Bushati më shumë se sa tek vendimi i BE u përqendrua tek sulmet ndaj opozitës në fjalën e tij në foltoren e parlamentit. Ai tha se sjellja e opozitës është një shfaqje e shëmtuar që mund të tregojmë tek Brukseli dhe Parisi, por edhe tek shqiptarët. Po ashtu ai tha se Këshilli Europian iu përgjigj pozitivisht rekomandimit, ndërsa shtoi se caktoi edhe datën për çeljen e negociatave.
“Ju vijuat me sjelljen tuaj dhe akuzat. E shehni Shqipërinë të rrethuar nga armiqtë. Sapo dëgjoja kryetarin e PD dhe kryetarin e grupit të PD, më bëri përshtypje se nuk e kuptoj se për çfarë e keni këtë debat? Për kë e keni këtë debat? Për të na mbushur mendjen se si e shihni ju Shqipërinë. Kjo është shfaqja më e gabuar që ne mund t’i organizojmë jo vetëm Brukselit, apo Parisit, por qytetarëve të zakonshëm të këtij vendi. Cilat janë mesazhet? Këshilli i përgjigjet pozitivish rekomandimit për Shqipërinë. Mesazhi i dytë; këshilli përcakton datën, vitin 2019 për çelen e negociatave. Mesazhi i tretë; këshilli përcakton punën përgatitore për momentin e bisedimeve për anëtarësim. Këshilli vlerëson të gjitha reformat që ka ndërmarrë Shqipëria nga 2016-ta dhe deri në 2018-ën”, tha Bushati.
/Opinion.al
*Video, fjala e Luan Rames ne parlament
Video, fjala e Bushatit
