Kryeministri Edi Rama doli sot hapur në mbrojtje të Fatmir Xhafës. Duke folur në foltoren e parlamentit, pasi opozita kishte braktisur sallën, ai tha se “historia e dosjes së vëllait të ministrit është e konsumuar dhe se nuk ka asgjë të vertete”. Sipas Ramës, po të ishte për të folur do ta kishte bërë ambasadori amerikan Donald Lu përpara opozitës, duke e sfiduar në një farë mënyre, Lu-në të reagojë.
“Nëse do kishte përgjegjësi (ministri) besoj se asnjë shqiptar nuk e quan të paarsyeshme bindjen tim që përpara se të flisnin këta (PD), do fliste ambasadori amerikan, Donal Lu do kishte folur BE, do kishin folur ata të cilët nuk kanë lënë rast pa folur, pasi nuk kanë lënë rast pa verifikuar. Ata as kanë folur, dhe as kanë çfarë të thonë fare. Se është fakt i njohur dhe nuk përbën asnjë implikim direkt ose indirekt qoftë të qeverisë. A mund ta përfytyrojë kush që nëse do të kishte një fije të vërtetë për lëvizjen e kreut të Prokurorisë për Krime të Rënda do kishte dalë miku ynë i shtrenjtë i njohur si i kudondodhuri i gjithë proceseve në reforma për të vënë drejtësi në këtë vend. Nuk diskutohet”, u shpreh kryeministri Rama.
Dje, Partia Demokratike publikoi një dosje të autoriteteve italiane sipas së cilës Gjykata e Lartë kishte lënë në fuqi vendimet e shkallës së parë dhe apelit për të dënuar me 7 vjet e dy muaj burg për vëllain e Fatmir Xhafës, Agron Xhafën, si organizator i një bande kriminale të trafikut të drogës nga Shqipëria në Evropë dhe SHBA. Kjo ishte edhe kauza e opozitës sot në parlament. Lulzim Basha kërkoi dorëheqjen e Xhafës në nisje të seancës plenare, por Gramoz Ruçi më pas i ndërpreu fjalën me pretendimin se ka mbaruar koha. Kjo çoi në acarimin e opozitës. Deputetët e saj bllokuan foltoren, Ruçi ndërpreu seancën. Për afro 10 minuta Berisha mbajti fjalim që u transmetua vetëm në facebook, pasi me urdhër të Ruçit media kishte dalë jashtë sallës. Kur rinisi seanca dhe fjalën e mori Rama, opozita (PD+LSI) braktisi punimet e parlamentit. /Opinion.al
