Kryeministri Rama ishte sot në Vlorë në inagurimin e bulevardit pranë Lungomares. Ai mbajti edhe një fjalim ku u ndal tek projekti i aeroportit të Vlorës.
Kryeministri tha se procesi i kontraktimit të një kompanie ishte ngrirë për shkak të pandemisë dhe se puna pritet të nisë në fillim të tetorit kur priten të vijnë edhe ofertat e para.
“Padiskutim që ndërkohë që unë flas ka njerëz që bëjnë komentet e tyre e thonë s’është bërë akoma aeroporti, apo ku e ke aeroportin, të gjitha nivelet e ironisë së vlonjatëve apo shqiptarëve në përgjithësi. Janë fjalë që mund ti dëgjosh, por s’kanë lidhje me realitetin, jo se realiteti sot në Vlorë apo Shqiperi është rozë për të gjithë, as se transformimi ynë ka arritur ta bëjë Shqipërinë të dytën pas Gjermanisë, as e kemi thënë e as e kemi cuar në mend por, ne ballafaqohemi dhe me problemin e madh të dezinformimit të sajesave. Fjala e popullit “kur gënjeshtra e ka bërë xhiron e botës e vërteta s’ka veshur akoma pantallonat, rezulton të jetë e vërtetë. Prirja për të besuar sajesat është shumë e madhe sa prirja për të verifikuar faktet. Procesi për fillimin e punës u ndërpre nga karantina e përgjithshme dhe të gjitha kompanitë e interesuara bënë kërkesa për gjithë llojet e projekteve që të shtyhen. Ne procesin e ngrimë aty ku ishte, në javën e parë të tetorit procesi do rihapet dhe janë vetëm pak ditë ende që ne të marrim ofertat ndërkombëtare për të lidhur pastaj kontratën për ndërtimin e aeroportit të Vlorës. Doja që kjo të kishte ndodhur më parë, por eksperienca më ka mësuar e ka mësuar këdo që merret me projekte e punë të kësaj natyre, që ka të papritura, vonesa nevoja që shfaqen rrugës e janë të paparashikuara. Patjetër që ka një rrugë të gjatë për të bërë deri kur lidhet një kontratë”, tha Rama.
Projekti i aeroportit të Vlorës u prezantuar nga kryeministri Rama në shtator të vitit 2019. Ai nuk dha atëherë detaje për procesin e kontraktimit të kompanisë ndërtuese por tha se aeroporti do të ndërtohet nga buxheti i shtetit.
Zyrtarish gara për ndërtimin e aeroportit të Vlorës u hap më 19 dhjetor të vitit 2019. Afati i garës u la deri më 12 mars dhe ministrja e Infrastrukturës, Belinda Balluku tha se punimet do të nisin më 31 maj 2020./ Opinion.al
