Rritja e rrogave dhe pensioneve ka qenë në fokus të komunikimit të sotëm të Kryeministrit Rama me qytetarët. Sipas Ramës, niveli i pagës më të ulët në vendin tonë do t’ia kalojë Kosovës, Malit të Zi dhe Kroacisë dhe do t’i afrohet asaj të Maqedonisë. Ndërsa rroga mesatare do të bëhet më e lartë se sa në Kosovë dhe Serbi.
Ne komunikimin ne rrjetin social Facebook, Kryeministri pohoi se qeveria do të japë rreth 100 milionë dollarë për rritjen e rrogave dhe pensioneve. Rama për të bërë një krahasim u shpreh se në tetë vite qeveria “Berisha” shpërndau për rroga dhe pensione vetëm 124 milionë dollarë.
Kreu i qeverisë theksoi se 520 milionë dollarë do t’i kalojnë pensionistëve dhe punonjësve të administratës deri në fund të këtij mandati ndaj, Shqipëria nuk do të jetë më e fundit në rajon për rrogën më të ulët dhe për rrogën mesatare.
