Kryeministri Edi Rama tha se janë në diskutim për të sjellë elementë të industrisë ushtarake.
Gjatë një takimi me biznesin e vogël në Shkodër, Rama tha de
“Jemi në diskutime për të sjellë edhe një element të industrisë ushtarake në Shkodër, në periferi që do të ishte mirë për punësimin, por edhe për profesionistët e rinj.
Nëse për industri ne kemi një ekstrem nga njëra anë, të historisë së tranzicionit që ishin fasonët, industria ushtarake është ekstremi tjetër kur vjen puna tek niveli i përgatitjes dhe tek niveli i shpërblimeve për punonjësit”, u shpreh Rama.
Më tej, Rama rreshtoi një sërë projektesh që do të finalizohen në këtë qytet.
“Shkodra ka një kontribut në arkivin e botës. Ka qenë në fije të perit, i mbytur nëpër thasë, një tmerr i madh. E dini që ndërtuam Muzeun, vumë nën kontroll arkivin me laborator e të gjitha. Përtej ndjeshmërisë e vullnetit tonë, në Tiranë dua t’i njoh meritën një djali që do mbetet në histori si njeriu që shpëtoi Arkivin dhe Shkodrën nga një turp i madh. Është realisht përkushtimi, mënyra shumë personale që ai e sheh atë pasuri si pjesë të trupit të vet dhe jam i privilegjuar që kam pasur mundësi ta njoh.
Muzeu i ri i Kujtesës, një tjetër derë ku jo vetëm të huajt, por edhe ne mund të shohim fizikisht brutalitetin e asaj kohe. Kemi projektin e Sheshit të Xhamisë së Madhe të Shkodrës që shpresojmë ta bëjmë realitet. Do të krijohet një hapësirë e madhe për kulturë, muzalizim në një kënd tjetër historie. Nuk duhet harruar kurrë se si feja ka rrugëtuar deri sot në Shqipëri.
Muzeu i Lundrimit, projekt i nisur, në këmbët e Kalasë së Rozafës. Muzeu Etnografik që shpresoj shumë ta çojmë përpara. Edhe sigurisht Pinakotekën. Jemi në diskutim për transformimin e bashkisë, për ta kthyer në muze, admninistrata s’e ka problem të lëvizë diku tjetër sepse është gjynah që ajo mos hapet dhe mos vizitohet nga të gjithë”, tha Rama.
