Kryeministri Edi Rama ka dënuar ashpër aktin e dhunës ndaj gazetarit Elvi Fundo që drejton portalin CityNeës. Përmes një statusi në rrjetet sociale Rama u shpreh “dënoj me forcë aktin e dhunës ndaj gazetarit Elvi Fundo.Zbardhje e plotë sa më parë e këtij krimi.Neveri për politizimin e këtij akti nga PD”.
Më herët Partia Demokratike përmes një deklarate për mediat tha se “kjo goditje ndaj fjalës së lirë dhe lirisë së shypit vjen në kohën kur qeveria Rama është e angazhuar frontalisht në shantazhe dhe kërcënime ndaj medias me qëllim kapjen e saj totale dhe asgjesimin e fjalës së lirë”.
Për dhunën ndaj gazetarit ka reaguar edhe Autoriteti i Mediave Audiovizive. “Ne e konsiderojmë këtë akt të rëndë si kërcënim të drejtpërdrejtë ndaj medias dhe fjalës së lirë. Fundo prej vitesh është i angazhuar në transmetimet radiofonike, si dhe njihet si një gazetar kritik ndaj zhvillimeve në vend”, thotë AMA.
“Goditja në publik e një punonjësi aktiv të medias është një zhvillim trishtues dhe alarm për demokracinë. Apelojmë për autoritet e rendit dhe të sigurisë që të bëjnë gjithçka për zbulimin sa më parë të autorëve dhe rrethanave të kësaj ngjarje të rëndë, në mënyrë që fajtorët të dalin para drejtësisë”, deklaron AMA.
