Kryeministri Edi Rama i ka bërë thirrje qytetarëve që të refuzojnë thirrjet e opozitës për bllokimin e rrugëve nesër.
Gjatë “Komunikimit Javor” në Facebook, kreu i qeverisë foli gjatë për protestën e opozitës, çadrën në Bulevard dhe paralajmërimin për nisjen e një mosbindje civile për bllokimin e rrugëve nacionale që lidhen me kryeqytetin, mesditën e të hënës për një orë nga 11:00 në 12:00.
“U them sot të gjithë shqiptarëve, demokratëve, mos i jepni asnjë shans, asnjë mbështetje politikanëve që kanë frikë nga drejtësia. Mos i jepni asnjë të drejtë kujtdo që pengon rrugën drejt BE.
Refuzoni të bëheni mercenarë të politikës së përbuzjes, duke bllokuar rrugët ku kalojnë njerëzit, nxënësit, punonjësit të sëmurët, sipërmarrësit, të mirat materiale që furnizojnë përditë me gjak ekonominë tonë kombëtare dhe ekonominë e të gjitha familjeve tona. Policia e Shtetit nuk paguhet për të liruar rrugët nga qytetarë të manipuluar nga politika e përbuzjes, por për të qenë në krah të çdo qytetari, për të mbrojtur çdo njeri nga keqbërësit, për të garantuar rend, siguri, qetësi.
Ata që ftojnë njerëzit të bllokojnë rrugët duan të na kthejnë në të tatëpjetën e rrëmujave e të konflikteve. Vetëm e vetëm që t’i venë flakën Shqipërisë, që të mos vijë drita e drejtësisë në këtë vend, që të mos hapen kapaku i zullumit të drejtësisë dhe krimeve të pandëshkuara që të mos shpëtojë më në fund ky popull nga zgjedha e kulturës së pandëshkueshmërisë së njerëzve të veshur me pushtet e të zhytur në para të zeza.
Por, njëkohësisht, Policia e Shtetit ka për detyrë të dokumentojë çdo shkelje të ligjit dhe të çojë përpara ligjit çdo shkelës. A ia vlen të përfundosh përpara bankës së të akuzuarve për të mbrojtur politikanë dhe gjykatës të korruptuar? A ia vlen të akuzohesh si keqbërës i popullit dhe i vendit tënd për t’i zënë rrugën drejtësisë që të duhet ty dhe të familjes tënde për të mbrojtur ata që s’duan drejtësi sepse i friken si djalli temjanit drejtësisë mbi ta”, u shpreh Rama.
