Kryeministri Edi Rama ka prezantuar një projekt të ri të Rilindjes Urbane në qytetin e Vlorës.
Ai nuk ka dhënë detaje për projektin se sa do të kushtojë dhe për procedurat e ndërtimit tij.
Konkretisht projekti quhet “Parku i shtëpisë së pavarësisë” i cili siç shkruan Rama do të shtrihet nga rrethrrotullimi i Skelës deri tek porti.
Në pamjet e maketeve 3D të publikuara nga kryeministri duket se synohet të ndërtohet një zonë e gjelbër me hapësira për aktivitete të ndryshme.
“PARKU I SHTËPISË SË PAVARËSISË është projekti më i ri i Rilindjes Urbane të Vlorës, i cili do të marrë jetë së shpejti në hapësirën këmbësore nga rrethrrotullimi i Skelës deri tek porti, ku do të lidhë bulevardin e ri Ismail Qemali me Lungomaren, një oaz fantastik me shtëpinë e flamurit mes gjelbërimit dhe plot kënde pushimi e argëtimi për të gjitha moshat”, shkruan Rama./ Opinion.al
