Kryeministri Rama ka bërë edhe njëherë sot apel për durim në atë që ai e quan prej ditësh tashmë “luftë” me koronavirusin.
Në një postim në Facebook, Rama paraqet një krahasim të gjendjes në provincën e Lodit dhe të Bergamos në Itali të cilat janë dy nga zonat më të goditura nga pandemia.
“Në Lodi masat shtrënguese u morën në 22 shkurt, ndërsa në Bergamo vetëm në 8 mars. Grafiku majtas tregon se si masat e frenuan armikun në LODI, ndërsa në BERGAMO ato hynë në fuqi kur armiku kishte përparuar ndjeshëm, prandaj edhe dallimi mes numrit të të infektuarve dhe të të vdekurve në dy zonat fqinje është tronditës!”, shkruan Rama.
Ai ka bashkangjitur gjithashtu një foto tronditëse të karvanit të kamionëve të ushtrisë italiane, që transportonte mbrëmë nga Bergamo drejt 12 zonave të tjera të Italisë, trupat e viktimave të koronavirusit.
“Ne duhet ta shmangim me çdo kusht dhe çmim katastrofën humanitare që po ndodh ne Bergamo dhe në zonat e veriut të Italisë, ku sistemi ekselent shëndetësor ra në gjunj, sepse nuk u mbrojt nga muri i masave shtrënguese! Durim, durim, durim! Nuk duhet të na ndodhë që ta mësojmë se çfarë të gjen nëse nuk lufton sa s’është vonë!”, përfundon Rama postimin e tij. /Opinion.al
